Aralas jekpe-jek: Azat Maqsum jeńilip kórmegen brazılııalyqty jyqty
ALMATY. QazAqparat – Almatyda aralas jekpe-jekten ótip jatqan Octagon 39 týrnırinde basty aıqasta Azat Maqsum (15-0) men brazılııalyq Fabrıtsıo Nýnes (8-0) kezdesti, dep habarlaıdy QazAqparat Sports.kz-ke silteme jasap.
A.Maqsum jekpe-jekti belsendi bastap, birinshi raýndtyń sońyna 10 sekýnd qalǵanda qarsylasyn býyndyrý ádisimen jeńdi.
Aıta ketsek, qazaqstandyq sportshy byltyr álemniń beldi promoýsheni – UFC-degi debıýdti jekpe-jek ótkizýdiń az-aq aldynda turǵan edi. Alaıda qoly synyp, Amerıkanyń atalǵan uıymymen kelisimshartqa qol qoıýdy keıinge qaldyrýǵa týra keldi. Azat Maqsumnyń komandasy onyń UFC-degi alǵashqy aıqasy bıylǵy jyldyń birinshi jartyjyldyǵynda ótýi múmkin ekendigin aıtty.
Eske salaıyq, Almatydaǵa Octagon 39 týrnırinde buǵan deıin qazaqstandyq Baýyrjan Qalmurzaev reseılik faıter Konstantın Cherednıchenkomen (15-19) kezdesip, ony 20-sekýndta nokaýtqa jiberdi.
Sondaı-aq qazaqstandyq Janserik Jaqsyǵulov ta túrik Fatıh Shentýrkti (2-1) nokaýtpen jeńdi.
Qazaqstannyń taǵy bir sportshysy – Álisher Ǵabdýllın ázerbaıjandyq Serhan Valılımen (8-4) kezdesti. Ǵabdýllın qarsylasyn býyndyrý ádisimen jeńdi.
