Aral teńiziniń tartylýy Qyrǵyzstandaǵy muzdyqtarǵa qalaı áser etedi
ASTANA.KAZINFORM - Bishkekte «Turaqty damý úshin jahandyq taý dıalogy: Bishkek+25 sammıtine qaraı» atty halyqaralyq konferentsııa ótip jatyr. Onda klımat ózgerisiniń ekologııalyq máseleleri, olardyń muzdyqtar men krıosferaǵa áseri talqylanyp jatyr, dep habarlaıdy Kazinform tilshisi.
Qyrǵyz Respýblıkasynyń Prezıdenti Sadyr Japarov kirispe sózinde taýly elder biregeı resýrstarǵa ıe bola otyryp, bir mezgilde klımattyń ózgerýine, ekstremaldy aýa raıy jaǵdaılaryna jáne tabıǵı apattardyń áserine ushyraıtynyn atap ótti. Olar muzdyqtardyń erýi, bıoártúrliliktiń joǵalýy jáne taý ekojúıeleriniń degradatsııasy sııaqty birdeı problemalarǵa tap bolady. Ekologııalyq problemalardy sheshý shuǵyl sharalardy, kelisilgen áreketterdi jáne álemdik qaýymdastyqtyń nazaryn talap etedi.
Qazaqstan Respýblıkasy Ekologııa jáne tabıǵı resýrstar vıtse-mınıstri Nurlan Qurmalaev óz sózinde taýly aımaqtardaǵy bıoártúrlilikti saqtaýdyń mańyzdylyǵyn, sondaı-aq turaqty damýǵa baǵyttalǵan jahandyq kúsh-jiger kontekstinde aımaq elderi arasyndaǵy jalǵasyp jatqan dıalogtyń mańyzdylyǵyn atap ótti.
- Qazirgi ýaqytta Qazaqstan 2026 jyly aımaqtyq klımattyq sammıtti ótkizýge belsendi túrde daıyndalyp jatyr jáne bul ǵylymı yntymaqtastyq, klımattyq derekter almasý jáne taý ekojúıeleri úshin birlesken beıimdelý sheshimderin ázirleý turǵysynan mańyzdy, - dedi ol.
Qyrǵyz Respýblıkasynyń Tabıǵı resýrstar, ekologııa jáne tehnıkalyq qadaǵalaý mınıstri Meder Mashıev Aral teńiziniń joǵalýy Qyrǵyzstan muzdyqtaryna áser etip, olardyń qarqyndy erýine ákeletini moıyndalǵan faktimen kelisetinin aıtty.
Qyrǵyzstan parlamentiniń depýtaty, Agrarlyq saıasat, sý resýrstary, ekologııa jáne óńirlik damý komıtetiniń múshesi Álisher Erbaev aımaqtyq ekologııalyq máselelerdi sheshýde Ortalyq Azııanyń barlyq bes elin biriktirý qajettigi týraly pikirimen bólisti.
Osyǵan deıin Aral teńiziniń qurǵaǵan ultanyna dronmen sekseýil tuqymy sebile bastaǵany týraly jazdyq.