Aral teńiziniń soltústik bóligin qalpyna keltirý jáne damytý jobasy ázirlenip jatyr

ASTANA. KAZINFORM — Soltústik Aralǵa shamamen 5 mlrd tekshe metr sý jiberilip, sý aıdynynyń kólemi 24,4 mlrd tekshe metrge deıin ulǵaıdy. Bul týraly Sý resýrstary jáne ırrıgatsııa mınıstri Nurjan Nurjigitov málim etti.

— Sý sharýashylyǵy salasyndaǵy mańyzdy baǵyttardyń biri — Araldy qalpyna keltirý máselesi. Mınıstrlik qurylǵan sátten bastap Soltústik Aralǵa shamamen 5 mlrd tekshe metr sý jiberilip, sý aıdynynyń kólemi 24,4 mlrd tekshe metrge deıin ulǵaıdy. Qazir Dúnıejúzilik banktiń granty esebinen «Aral teńiziniń soltústik bóligin qalpyna keltirý jáne óńirlik damytý» jobasynyń tehnıkalyq-ekonomıkalyq negizdemesi ázirlenip jatyr, — dedi Nurjan Nurjigitov Úkimet otyrysynda.

Mınıstrliktiń málimeti boıynsha, atalǵan joba aıasynda Soltústik Aral teńizin qurǵatpaı, Kókaral bógetiniń bıiktigin 2 metrge kóterý, sondaı-aq Qamystybas jáne Aqshataý kóliniń sý deńgeıin tolyqtyrý jáne ustap turý úshin Amanótkel-2 gıdrotorabyn salý qarastyrylyp jatyr.

— Jalpy, júrgizilip jatqan is-sharalar kesheni — ınfraqurylymdyq nysandardy salý jáne jańǵyrtý, sý únemdeý jáne tsıfrlyq tehnologııalardy engizýge baǵyttalǵan. Sonymen qatar klımattyq táýekel artýy jaǵdaıynda eldiń sý resýrsyn turaqty paıdalanýdy qamtamasyz etýge mán beriledi, — deıdi vedomstvo basshysy.

Bıyl kóktemde Úkimet basshysynyń orynbasary Qanat Bozymbaev Araldy qutqarý qorynyń reformasynan zor úmit kútiletinin málimdegen edik.