Aral teńiziniń tabanyna 10 myń gektar sekseýil otyrǵyzylady
Endigi kezekte bul ıgilikti iske Ońtústik Koreıa memleketi qol ushyn sozyp otyr. Olardyń qarjy bólýi nátıjesinde Qazaqstannyń bıologııalyq alýan túrliligin saqtaý qory arqyly 2018-2019 jyldar aralyǵynda 10 myń gektar alqapqa sekseýil otyrǵyzylady
Mańyzdy istiń qolǵa alynǵanyna búgingi tańda shırek ǵasyrǵa jýyqtady. Ústimizdegi jyly qurylǵanyna 25 jyl tolǵan Araldy qutqarý jónindegi halyqaralyq qordyń qoldaýymen sodan beri qanshama ıgilikti isterge jol ashyldy.
«Elimizdiń Aýyl sharýashylyǵy mınıstrligi orman sharýashylyǵy jáne janýarlar dúnıesi komıteti bul baǵytta naqty is-sharalardy qolǵa alyp otyr. Atalmysh komıtet mamandary bıyl bul iske Ońtústik Koreıa memleketin tartyp otyr. Aldaǵy ýaqytta aýqymdy aýmaqta sekseýil jaıqalyp, Aral teńizi aımaǵynda bıoalýandyqty saqtaýǵa oń áserin tıgizedi degen oıdamyn. Osy maqsatta Aral orman jáne janýarlar dúnıesin qorǵaý mekemesiniń ıgiligi úshin mamandarǵa «Balearýs» traktory, zamanaýı úlgidegi ormanshylar vagony, ÝAZ avtokóligin tartý etip otyrmyz», - deıdi Qazaqstannyń bıologııalyq alýan túrliligin saqtaý qorynyń dırektsııa basshysy Asylhan Asylbekov.
Mamandardyń aıtýynsha, sekseýildiń ósýi joǵary kórsetkishke jetken. Sońǵy 25 jyldyń ishinde munda 156 myń gektar alqapqa sekseýil otyrǵyzylǵan.
«Sekseýil egý úshin teńiz ultanyna baryp qaıtýǵa májbúrmiz. Osyndaı sátte tehnıkanyń qajettiligi zor. Ońtústik Koreıa memleketiniń bul qoldaýy bizder úshin zor kómek bolyp otyr», - deıdi Aral orman jáne janýarlar dúnıesin qorǵaý mekemesiniń qyzmetkeri Muratbek Smaıylov.
foto:otyrar.kz
Ádilet QAŃTARBAEV
