Aral teńizine batyp ketken er adamnyń denesi tabyldy
QYZYLORDA. QazAqparat - Qyzylorda oblysyndaǵy Kishi Aral teńizi aýmaǵynda eki kún buryn motorly qaıyqtan aýdarylyp, sýǵa batyp ketken 43 jastaǵy azamattyń denesi tabyldy, dep habarlaıdy QazAqparat tilshisi.
Eske salsaq, oqıǵa 7 shildede Kishi Aral teńizi aýmaǵynda bolǵan. Ol Aqespe aýylynan 3 shaqyrymdaı qashyqtyqta ornalasqan. 1978 jylǵy azamat saǵat 16.00-de motorly qaıyqpen ketip bara jatqan sátinde teńizge batyp ketken.
«Oqıǵa ornyna oblystyq tótenshe jaǵdaılar departamenti órt sóndirý qyzmetiniń jedel-qutqarý jasaǵynan 4 qutqarýshy men 1 tehnıka bardy. Sýǵa ketken azamattyń múrdesi 9 shildede saǵat 17.43-te tabyldy. Qutqarýshylar marqumnyń máıitin týysqandaryna tapsyrdy», - dedi oblystyq tótenshe jaǵdaılar departamenti órt sóndirý jáne avarııalyq qutqarý jumystary qyzmetiniń mamany Álııa Erejepova.
Vedomstvo málimetinshe, jyl basynan beri 38 adam sýǵa ketken. Onyń ishinde 20-sy bala.
