Aral teńizindegi Kókaral bógetine balyq qorǵaý qurylǵysy ornatylady
NUR-SULTAN. QazAqparat - Aral teńizindegi Kókaral bógetine balyq qorǵaý qurylǵysy qoıylady, dep habarlaıdy Habar24.kz.
Gıdroakýstıkalyq qondyrǵy SARATS jobasy aıasynda salynǵan 17 shaqyrymdyq 9 ótkizgishten balyqtardyń óli teńizge ketip qalýyna kedergi bolady. Jalpy búginde Aral balyqshylary jylyna jeti myń tonnadaı balyq aýlap, onyń eki myń tonnasyn eksporttaıdy. Qazirde aıdyn 18 aýmaqqa bólinip, tabıǵat paıdalanýshylarǵa bólinip berilgen. Aral aýdanynda jyldyq qýaty on toǵyz myń tonna balyq óńdeýge qaýqarly jeti kásiporyn bar.
Zaýyttar Qytaı men TMD elderinen bólek Eýropaǵa balyq saýdalaıdy. Teńizge jylyna on bes mıllıon dana shabaq jiberiledi. Biraq Kókaral bógeti arqyly mol sýmen birge balyq uly teńizge qaraı ketip jatyr. Osy rette Araldy qutqarý qory arqyly gıdroakýstıkalyq qondyrǵy ornatylmaq.
«Eger osy jobany jyldyń aıaǵyna deıin bitiretin bolsaq, keler jyldan bastap, balyq qutqarý gıdroqurylǵysynyń kómegin paıdalana bastaımyz. Gıdroakýstıka balyqtyń sensorlyq organdaryna áser etedi, ıaǵnı olardy úrkitedi. Basqa esh zııany joq. Aýdanda teńizden bólek jıyrma kól bar. Olardan da balyqtyń on tórt túri aýlanady. Tájirıbeli balyqshylar men sala mamandary endi balyq qoryn molaıtý úshin kólder júıesin de jetildire túsý kerektigin aıtady»,-deıdi «Balyq sharýashylyǵy ǵylymı-óndiristik ortalyǵy» Aral bólimshesiniń dırektory Tynysbek Baraqbaev.
Al balyq sharýashylyǵy salasynyń ardageri Qudaıbergen Sarjanov bolsa: «Aqbasty men Qulandynyń ortasynda ózek bar. Sol jerge shlıýz qoıyp, soǵan deıin sý deńgeıi kóterilse, artyq sý úlken teńizge ketpeı, ózek arqyly Tuşybas degen jerge barady. Tuşybasty toltyryp alsaq, Qambash kólinen kem bolmaıdy. Qambash kóli jylyna 300-400 tonnadaı balyq berip otyr. Al mynadan jylyna myń tonna balyq aýlaýǵa bolady. Jalpy 2000 jyldan beri Araldan balyq aýlaý kólemi jıyrma esege ósti. Qazirgi tańda 31 brıgada qurylyp, myńǵa jýyq balyqshy óz nápaqasyn teńizden terip júr»,-deıdi.
