Aral teńizi týraly jańa derekti fılm túsirildi
ALMATY. Maýsymnyń 15-i. QazAqparat /Erbol Turymbetov/ - Aral máselesi áli kúnge deıin tolyqqandy óz sheshimin tappaı keledi. Bul búgin Almatyda «Tuńǵıyqtan qaıta tirilý: Aral qasireti» dep atalatyn dóńgelek ústel jıynynda aıtyldy,
dep habarlaıdy QazAqparat.
Ony Qazaqstannyń strategııalyq zertteýler ınstıtýty, Araldy qutqarý halyqaralyq qory Atqarýshy komıteti, «Qazaqstan» ulttyq telearnasy, «Nemis tolqyny» medıakompanııasy jáne Germanııanyń Almatydaǵy Bas konsýldyǵy birlesip uıymdastyrdy. Bul basqosý kezinde «Tuńǵıyqtan qaıta tirilý: Aral qasireti» dep atalatyn jańa derekti fılmniń tusaýy kesildi. Stsenarıı avtorlary - Tatıana Jandildına men Ýlı Hýfman, al rejıssery - Dına Baısúgir.
«Bul jobanyń iske asýy Germanııanyń Qazaqstandaǵy jylyna tuspa-tus kelgenine qýanyshtymyn. Biz Qazaqstanmen ózara tyǵyz baılanysymyzda tabıǵat máselelerin de nazardan tys qaldyrmaýǵa tyrystyq. Soǵan saı, «Qazaqstan» ulttyq telearnasy men «Nemis tolqyny» radıosynyń birlesip túsirgen bul fılmine qoldaý bildirdik», dedi Germanııanyń Bas konsýly Gerold Amelýng.
«Fılmde Aral teńiziniń soltústik bóliginiń búgingi hal-ahýaly, ondaǵy turǵyndardyń jaǵdaıy sóz bolady. Biz bes kúndik sapar kezinde teńiz tirshiliginiń qaıta jandana bastaǵanyn kórdik. Bóget arqyly sýdyń tolysyp kele jatqanyna kýá boldyq. Fılmde biz KSRO zamanynan qalǵan qaýsaǵan kemelerdi kórsetkimiz kelmedi. Aral qasiretin otany Syr óńiri bolyp tabylatyn Qorqyttyń qobyzy áldeqaıda jaqsy sezindiredi degen sheshimge keldik», deıdi fılm avtorlarynyń biri Tatıana Jandildına. Onyń aıtýynsha, endi Aral teńiziniń ońtústik jaǵalaýlaryna saıahat jasaý josparlanyp otyr. Buǵan deıin Aral teńizi týraly 1985 jyly Sergeı Ázimovtyń «Araldy joqtaý» degen derekti fılmi túsirilgen bolatyn. Alaıda ol Keńes zamanynda túrli kedergilermen kórermenge jetpeı qaldy.
