Aral teńizi tabanynda paıda bolatyn tuz aralas shańdy daýyldar ǵaryshtan da kórinedi - A. Aıymbetov

ALMATY. QazAqparat- Aral teńiziniń tabanynda paıda bolatyn tuz aralas shańdy daýyldardy ǵaryshtan da jáı kózben kórýge bolady. Bul týraly búgin Almatyda «Ionosfera ınstıtýty» enshiles jaýapkershiligi shekteýli seriktestiginde ótip jatqan Halyqaralyq «Aldyńǵy qatarly ǵaryshtyq zertteýler men tehnologııalar» ǵylymı-tájirıbelik semınar-otyrysy barysynda Qazaqstannyń úshinshi ǵaryshker-ushqyshy, Halyq qaharmany Aıdyn Aıymbetov málimdedi.

«Ǵaryshtan, ıaǵnı 400 shaqyrymdyq bıiktikten Aral teńiziniń tabanynda paıda bolatyn tuz aralas shańdy daýyldy jáı kózben de kórýge bolady. Onyń taralý radıýsy 10 shaqyrymnan birneshe júzdegen shaqyrymǵa jetedi. Sonymen qatar, ǵaryshtan shańdy daýyldar ǵana emes, ormandy alqaptarda bolatyn órtter de ǵaryshtan jer ananyń ádemi júzin osqylaǵan sheshek aýrýy sekildi kórinip jatady», - dedi A. Aıymbetov.

Aıta ketelik, qazaqstandyq ǵaryshker ústimizdegi jyldyń 2-12-shi qyrkúıegi aralyǵynda Halyqaralyq ǵarysh stansasynda QR Aeroǵarysh komıtetiniń Ulttyq ǵaryshtyq zertteýler jáne tehnologııalar ortalyǵy ázirlegen besinshi ǵylymı baǵdarlamany júzege asyrǵan bolatyn. Sol baǵdarlama aıasynda Aıdyn Aıymbetov Aral teńizi, elimizdiń taýlaryndaǵy muzdyqtar jáne Kaspıı teńizi aımaǵyna geofızıkalyq monıtorıng júrgizdi. Osy maqsatta jasalǵan ǵylymı tájirıbelerdiń qorytyndysy Ulttyq ǵaryshtyq zertteýler jáne tehnologııalar ortalyǵynda zertteletin bolady.