Aral teńizi: EQYU Parlamenttik Assambleıasynyń delegatsııasy 2023 jyly óńirge keledi

ASTANA. QazAqparat – Aral teńiziniń problemasy tek 60 mln astam halqy bar Aral aımaǵyndaǵy memleketter úshin ǵana emes, búkil álem qoǵamdastyǵy úshin de syn-qaterge aınaldy. Bul týraly EQYU Parlamenttik Assambleıasynyń komıteti keńesine onlaın qatysqan QR Parlamenti Senaty tóraǵasynyń orynbasary Asqar Shákirov aıtty, dep habarlaıdy QazAqparat Palatanyń baspasóz qyzmetine silteme jasap.

EQYU Parlamenttik Assambleıasynyń Ekonomıkalyq máseleler, ǵylym, tehnologııa jáne qorshaǵan orta jónindegi komıteti keńesinde EQYU óńirindegi ekonomıkalyq jáne ekologııalyq qaýipsizdikti qamtamasyz etýdiń ózekti máseleleri talqylandy.

Qazaqstan ókili, Parlamenttik Assambleıa tóraǵasynyń orynbasary jáne Assambleıanyń Ornyqty damý salasyndaǵy maqsattar jónindegi arnaýly ókili bolyp tabylatyn Asqar Shákirov Aral teńiziniń problemasyna eýropalyq parlamentshilerdiń nazaryn aýdardy. Bul tek 60 mıllıonnan astam halqy bar Aral aımaǵyndaǵy memleketter úshin ǵana emes, búkil álem qoǵamdastyǵy úshin de syn-qaterge aınalǵanyn aıtty.

Aral teńiziniń qurǵaýy BUU tarapynan adam áreketinen týyndaǵan eń aýyr ekologııalyq apat retinde tanylǵany barshaǵa belgili jáne ony sheshý úshin búkil álem qoǵamdastyǵynyń kúsh-jigerin biriktirý qajet.

Osy máseleni sheshý maqsatynda EQYU-nyń yqtımal úlesin talqylaý úshin komıtet depýtattaryna, sondaı-aq EQYU-nyń múddeli parlamentshilerine ahýalmen egjeı-tegjeıli tanysýǵa Aral óńirine barý usynyldy.

Bul bastamany Qazaqstannyń klımattyń ózgerýine qarsy júzege asyp jatqan kúres aıasynda qarastyrǵan jón. Aǵymdaǵy jyldyń shilde aıynda Bırmıngemde ótken EQYU PA-nyń jyl saıynǵy sessııasynda Qazaqstan men Ózbekstannyń parlamenttik delegatsııalary Aral teńizin qutqarýǵa baılanysty jobalardy úılestirýge qatysýǵa donor elderdi shaqyrǵan bolatyn.

Komıtet bıýrosy osy másele boıynsha 2023 jyldyń birinshi jartysynda EQYU Parlamenttik Assambleıasynyń delegatsııasyn Aral óńirine jiberý týraly usynysqa qoldaý bildirdi.

Foto: pinterest.com