Aral problemasy: Bıyl SARATS jobasynyń ekinshi kezeńi bastalady

QYZYLORDA. QazAqparat - Qyzylordada «Syrdarııa ózeniniń arnasyn retteý jáne Soltústik Aral teńizin saqtap qalý» jobasynyń birinshi kezeńi óz máresine jetti. «Ǵasyr qurylysy» aıaqtalyp, Kókaral bógeti paıdalanýǵa berilgeli Aral jurtshylyǵynyń tirshiligi qaıta jańdana bastaǵandaı. Ata kásipti túletip, teńiz jaǵalaýyn kúzetip júrgenderderdiń tirligine bereke kirgen.

Bıyl SARATS jobasynyń ekinshi kezeńi bastalady. Súıinshi jańalyqty oblys ákimi Qyrymbek Kósherbaev aýdan halqymen ótken kezdesýde málimdedi.

«SARATS jobasy - Araldy jańdandyrýǵa kómegin tıgizedi. Bıyl osy jobanyń ekinshi kezeńin bastaımyz. Bul Elbasymyzdyń tikeleı qoldaýynyń arqasynda júzege asatyn bolady. Osylaısha, Nursultan Ábishuly Aral halqyna óziniń qamqorlyǵyn kórsetýde», - dedi aımaq basshysy.

SARATS jobasynyń ekinshi kezeńine qajetti qarajattyń jartysy dúnıejúzilik bankten bólinse, qalǵany respýblıkalyq bıýdjetten alynady. Jalpy, bul kezeń 8 jobadan turatyn bolady. Aldaǵy maqsattar oryndalǵan jaǵdaıda Aral teńizi aýdan ortalyǵyna bir shaqyrym jaqyndaıdy. Jańadan jumys oryndary ashylyp, balyq aýlaý kólemi artady.

«Meniń atam, ákem balyq sharýashylyǵymen aınalysqan. Ózim de osy kásippen aınalysamyn. Bolashaqta meniń balalarym da teńizden nápaqasyn tabatyn bolady. Sol sebepti de Araldyń qaıta jańdanǵandyǵyn qalaımyz. Kúndelikti balyq aýlap, ony ótkizip, 25-30 myń teńge aralyǵynda paıda tabamyz. Bul qatarymyzdan qalmaı, molshylyqta ómir súrýimizge jetedi», - deıdi Aral aýdanynyń turǵyny Áskerbek Basharov.

Aıta keteıik, ótken ǵasyrdyń jetpisinshi jyldary Aral halqy ózge aýmaqqa údere kóshken bolatyn. Teńiz tartylǵan tusta turǵyndardyń basqa amaly da qalmady.  Al, elimiz Táýelsizdik alyp,  SARATS jobasyn júzege asyrý bastalǵannan keıin balyq sharýashylyǵymen aınalysqysy keletinder teńiz jaǵasyna qaıta qonystandy. Jergilikti halyqtyń ekinshi tynysynyń ashylýyna Kókaral bógetiniń salynýy sep boldy. Uzyndyǵy 13 shaqyrym bolatyn nysannyń arqasynda Kishi Aral qaıta týlap, sý marjandary kóbeıdi.

Aınur Tóleshova