Aral óńiriniń agrarlyq jáne ekologııalyq turaqtylyǵyn damytý megajobasy qashan ázirlenedi
ASTANA. KAZINFORM – Aral óńiriniń agrarlyq jáne ekologııalyq turaqtylyǵyn damytý megajobasyn ázirleý respýblıkalyq bıýdjet baılanysty qarastyrylady. Bul týraly Senat depýtattarynyń saýalyna Premer-mınıstr Oljas Bektenovtiń jaýabynda aıtylǵan.
- Úkimet agrarlyq ǵylymdy damytý boıynsha júıeli jumys júrgizip keledi. Bul baǵyt aýyl sharýashylyǵyna arnalǵan ǵylymı zertteýlerdi qarjylandyrýdy keńeıtýge, ozyq tehnologııalardy engizýge jáne ǵylymı ázirlemelerdi óndiris salasyna transfertteýge baǵyttalǵan. Atalǵan sharalar 2030 jylǵa deıingi agroónerkásiptik keshendi damytý tujyrymdamasynda kózdelgen jáne salanyń tıimdiligi men turaqtylyǵyn arttyrýǵa baǵyttalatyn bolady,- dedi ol.
Úkimet basshysy agrarlyq ǵylymı uıymdardyń qyzmetin jetildirý de basym baǵyttardyń biri ekenine nazar aýdartty.
- Osylaısha, 2024-2026 jyldarǵa arnalǵan Baǵdarlamalyq-nysanaly qarjylandyrý aıasynda ınstıtýt birqatar ǵylymı-tehnıkalyq baǵdarlamany, onyń ishinde selektsııa jáne tuqym sharýashylyǵy, kúrishtiń genetıkalyq qoryn zertteý, qant qyzylshasynyń tózimdiligi, sondaı-aq mal azyqtyq daqyldardy ósirý tehnologııalaryn ázirleý jobalaryn iske asyrýda, - dedi Premer-mınıstr.
Onyń aıtýynsha, munan bólek, 2024-2026 jyldarǵa arnalǵan granttyq qarjylandyrý aıasynda Y. Jaqaev atyndaǵy Qazaq kúrish sharýashylyǵy ǵylymı-zertteý ınstıtýty - «Qyzylorda oblysynyń ósimdik sharýashylyǵyn ártaraptandyrý jaǵdaıynda mal azyqtyq daqyldardyń sorttyq tehnologııasyn ázirleý» baǵdarlamasynyń oryndaýshysy.
- Aral óńiriniń agrarlyq jáne ekologııalyq turaqtylyǵyn damytý boıynsha megajobany iske asyrýǵa arnalǵan ǵylymı-tehnıkalyq tapsyrmany qalyptastyrý jáne konkýrs jarııalaý máselesi respýblıkalyq bıýdjet múmkindikterin eskere otyryp qarastyrylady. Qazirgi ýaqytta AÓK salasyndaǵy ýákiletti organ 2027-2029 jyldarǵa arnalǵan ǵylymı-tehnıkalyq tapsyrmalardy qalyptastyrý boıynsha jumys júrgizýde. Onda ınstıtýttyń usynystary eskerilip, kúrish sharýashylyǵyn damytýǵa arnalǵan mindetter men tıisti qarjylandyrý kólemi kózdeledi, - dedi Oljas Bektenov.
Buǵan deıin Aral teńiziniń soltústik bóligin qalpyna keltirý jáne damytý jobasy ázirlenip jatqanyn jazǵan edik.