Aral óńirinde 110 jastaǵy keıýana turady
Bıyl 110 jasqa kelgen Jonaı Tanymbetova Sazdy aýylynda turady. Ǵasyr jasaǵan Jonaı áje qazir urpaǵynyń aldynda baqytty ómir keship keledi. Týǵan jerinde eńbek etip, aýyldyń órkendeýine úlesin qosqan aıaýly ana, ázız áje ómirge ákelgen 8 perzentinen 31 nemere, 60 shóbere men 9 shópshek súıip otyr.
Jonaı ájeniń qosqan qosaǵy Tólegen Tanymbetov aýylda ferma basshysy bolyp qyzmet atqarǵan. Ótken ǵasyrdyń otyzynshy jyldarynda eldi ujymdastyrý sharalaryna belsene qatysty. Keıýananyń ózi de qyrqynshy jyldarda elmen birge eńbek etken. 1967 jyly otaǵasy dúnıeden ótkende segiz balany ósirip-jetkizý aýyrtpalyǵyn Jonaı ananyń ózi kóterdi. Barlyǵyn azamat etip jetkizdi. Qazir olardyń barlyǵy ómirden óz ornyn taýyp, ǵasyr-ǵumyr ıesi urpaǵymen birge baqytty ǵumyr keship otyr.
«Árdaıym beıbit ómir bolsyn dep tileımin. Tynyshtyq, birlik árdaıym tolaıym tabysqa bastaıdy. Osyndaı baqytty ǵumyr keshý bárimizge buıyra bersin», - deıdi keıýana.
Al 106 jastaǵy Tájigúl Eńsepova búginde aýdanǵa qarasty Aralqum aýylynda turady. Qudaı qosqan qosaǵy - Tóreǵul ekeýi 9 balany aıaqtandyrǵan altyn qursaqty ana ónegeli áýlettiń otyn mazdatqan shamshyraǵy, aýyl-aımaq úshin keýdesi qazynaǵa toly estelik hat ispetti.
Bul áýletten taraǵan urpaqtar búginde bir qaýym elge aınalyp otyr. Qazirgi tańda 9 baladan 37 nemere, 70 shóbere jáne Aıdar esimdi bir shópshegi bar. Tájigúl ájeı tylda ter tókken, odan keıin de Raıym kolhozynda zeınet jasyna jetkenshe balyq sharýashylyǵy salasynda uzaq jyldar tabandy eńbek etti. Óziniń osynaý ǵıbratqa toly ǵumyrynyń júz tórtinshi kóktemin qarsy alyp otyrǵan ájemiz áli tyń.