Aral men Kaspıı teńizderiniń ekologııalyq problemasyn halyqaralyq deńgeıde sheshý qajet
ASTANA. KAZINFORM – Aral men Kaspıı teńizderiniń ekologııalyq problemalaryn sheshýge halyqaralyq deńgeıde qatysýdy kúsheıtý qajet. Bul týraly elordada ótip jatqan ІІ Astana Think Tank Forum-2025 halyqaralyq forýmynda Syrtqy ister mınıstriniń birinshi orynbasary Erjan Ashyqbaev aıtty.
- Qazaqstan klımat jónindegi jahandyq kún tártipke qomaqty úles qosady. Tıimdi klımattyq saıasatqa 2026 jyly Astanada ótetin óńirlik klımattyq sammıt septigin tıgizedi. Ol Ortalyq Azııa elderi arasynda strategııalardy úılestirý jáne ujymdyq sheshimder ázirleý úshin platformaǵa aınalady. Sonymen qatar Astana Aral men Kaspıı teńizderiniń ekologııalyq problemalaryn sheshý men sýyn saqtaýǵa halyqaralyq deńgeıde qatysýdy kúsheıtýge shaqyrady, - dedi mınıstrdiń birinshi orynbasary.
Sonymen qatar ol elimiz 2060 jylǵa qaraı kómirtegi beıtaraptyǵyna qol jetkizýge nıetti ekenin aıtty.
- Qazaqstan bul maqsatqa syndarly qaraıdy. Ekonomıkany ártaraptandyrýǵa, jańartylatyn energııa kózderin paıdalanýdy keńeıte otyryp, teńgerimdi energetıkalyq saıasatqa basa nazar aýdarady. Ulttyq ósim men energetıkalyq qaýipsizdik úshin ómirlik mańyzǵa ıe dástúrli energetıkalyq sektordy da damyta beremiz. Osynaý salmaqty ári shynaıy strategııa ekonomıkalyq turaqtylyqty saqtaı otyryp, kómirtegi beıtaraptyǵyna qol jetkizýge múmkindik beredi, - dedi ol.
Aıta keteıik, forým barysynda Ortalyq Azııa saraptamalaryn álemdik zertteý qaýymdastyqtarmen biriktiretin platforma iske qosyldy.
QR Prezıdenti janyndaǵy Qazaqstannyń strategııalyq zertteýler ınstıtýty uıymdastyrǵan is-sharaǵa álemniń 20 elinen 40-qa jýyq sheteldik sarapshy, jetekshi «aqyl-oı ortalyqtarynyń» basshylary men zertteýshileri qatysyp jatyr. Forým aıasynda ótetin 9 taqyryptyq sessııada álemdik saıasat pen halyqaralyq qatynastardyń negizgi baǵyttary talqylanbaq.