Aral mańy aýmaǵynyń ekologııalyq jaǵdaıy áli de bolsa halyq densaýlyǵyna qaýip tóndirýde
ASTANA. Qyrkúıektiń 2-si. QazAqparat /Ernur Aqanbaı/ - Aral mańy aýmaǵynyń ekologııalyq jaǵdaıy áli de bolsa halyq densaýlyǵyna qaýip tóndirýde. Bul týraly búgin Úkimette 2010-2014 jyldarǵa arnalǵan «Jasyl damý» salalyq baǵdarlamasyn tanystyrý kezinde Qorshaǵan ortany qorǵaý mınıstri Nurńǵalı Áshimov aıtty.
«Ekologııalyq apat aımaǵyna jatqyzylǵan Aral mańy aýmaǵynyń ekologııalyq jaǵdaıy áli de kúrdeli. Kórsetilgen problemalar tikeleı ekologııalyq júıelerge ǵana emes, halyq densaýlyǵyna da qaýip tóndirýde. Ásirese, olar tynys organdary, onkologııa, júrek-tamyr júıesi, teri, júıke aýrýlarymen naýqastaný jáne ólý deńgeıi joǵary respýblıkanyń iri qalalarynda jáne ónerkásiptik ortalyqtarda shoǵyrlanǵan.», dedi N. Áshimov.
Sonymen qatar, N. Áshimov Qazaqstan aýmaǵynyń úlkendiginen lastaný aýmaǵy az bolyp kórinýi múmkindigin aıta kele: «Biraq, shóleıttengen jáne tozǵan jerlerdiń aýdandary el aýmaǵynyń 70 paıyzyn quraıdy. Mysaly, 182 mln. gektar jaıylymdardyń 26 mln. gektary tozýdyń shekti dárejesine jetken», dedi.
