Aral, Qazaly, Qarmaqshyda – kóktaıǵaq: kólik qozǵalysy toqtatyldy
QYZYLORDA. QazAqparat - Qyzylorda oblysynyń Aral, Qazaly, Qarmaqshy aýdandarynda kóktaıǵaq bolýyna baılanysty tasjoldardaǵy kólik qozǵalysy toqtatyldy, dep habarlaıdy QazAqparat tilshisi.
«2019 jyldyń 10 jeltoqsan kúni jergilikti ýaqytpen 18 saǵat 30 mınýttan bastap aýa-raıynyń nasharlaýyna baılanysty barlyq kólikterdiń qozǵalysyna shekteý qoıyldy. Atap aıtqanda, oblystyq mańyzy bar M-32 «Samara-Shymkent» avtomobıl jolynyń 1240-1646 shaqyrym aralyǵynda osyndaı shekteý bar. Ol Aqtóbe oblysynyń shekarasynan bastap Qarmaqshy aýdanynyń Josaly kenti aralyǵyn qamtıdy», - dep málim etti Qyzylorda oblysy jumyldyrý basqarmasynan.
«Búgin Qazaly aýdany aýmaǵy men aýdan ortalyǵynda kóktaıǵaq bolyp tur. Osyǵan oraı Qyzylorda oblysynyń oblystyq mańyzy bar avtomobıl jolyndaǵy kólik qozǵalysy toqtatyldy. «Batys Eýropa – Batys Qytaı» halyqaralyq avtomobıl jolyndaǵy kólikterdi aýdandyq polıtsııa bóliminiń qyzmetkerleri avtomobılderdi ýaqytsha avtoturaqtarǵa qoıyp, júrgizýshilerdi ystyq shaımen qamtamasyz etýde», - dep málim etti Qazaly aýdany ákimdiginiń baspasóz hatshysy Jeńisbek Aıymqulov.
Qyzylorda oblysy jumyldyrý basqarmasynyń habarlaýynsha, oblys aýmaǵynda jańbyr, qar, kóktaıǵaq jaǵdaıyna baılanysty kólikterdiń qozǵalysyna shekteý qoıylǵan.
Dál osyndaı jaǵdaı Aral aýdanynda qaıtalanyp otyr. Aýdan ákimdigi jolaýshylarǵa saqtyq sharalaryna basa nazar aýdarý qajettigin aıtady.
