Aral aýmaǵynda sekseýil egý jospary qalaı oryndaldy
ASTANA. KAZINFORM – QR Ekologııa jáne tabıǵı resýrstar mınıstrligi Aral aýmaǵynda ekologııalyq ahýaldy jaqsartý úshin 2025 jylǵa deıin 1,1 mıllıon gektar jerge sekseýil egý josparyna qatysty túsinik berdi.
«2021 jyly Memleket basshysy ekologııalyq jaǵdaıdy jaqsartý maqsatynda 2025 jylǵa deıin Aral teńiziniń qurǵaǵan túbinde sekseýil ekpelerin otyrǵyzý jolymen jalpy aýdany 1,1 mln ga orman melıoratsııalyq jumystardy júrgizý mindetin qoıdy. 2021-2024 jyldary Aral teńiziniń qurǵaǵan túbinde 413 myń gektar aýmaqta orman melıoratsııalyq jumystar atqaryldy (sekseýil men galofıt ósimdikteriniń 2083,4 tonna tuqymy sebildi, 45,2 mln sekseýil kósheti otyrǵyzyldy). Sonymen qatar 197 myń gektar aýmaqqa ormannyń tabıǵı ósýine yqpal jasaý jumystary iske asyryldy», - delingen Ekologııa mınıstrliginiń Kazinform agenttigine bergen jaýabynda.
Vedomstvo aqparatyna qaraǵanda, 2024 jyly josparlanǵan 275 myń gektar aýmaqtyń 65 myń gektaryna aǵash otyrǵyzý jumystary kóktemgi mezgilde oryndaldy. Qalǵan aýmaqqa orman otyrǵyzý jumystary osy jyly kúzde atqarylyp jatyr.
«Atap aıtqanda, 2025 jylǵy jospar boıynsha 280 myń gektar qamtylady», - dep atalyp ótken mınıstrlik habarlamasynda.
Aıta keteıik, QMG qurǵaǵan Aral túbinde 15 myń gektar alqapqa 4 mıllıonnan astam sekseýil kóshetin otyrǵyzý boıynsha mindetteme aldy. https://kaz.inform.kz/news/kazmunaygazdin-koldauimen-aral-tenznn-kurgagan-tabanina-44-mln-nan-astam-sekseul-koshetter-egled-a7bdf5/
Bıyl shilde aıynda Prezıdent Qasym-Jomart Toqaev Túrki memleketteri uıymynyń beıresmı sammıtinde Kaspıı jáne Aral teńizderindegi ekologııalyq máselelerdi sheshý úshin birlesken kúsh-jiger qajet ekenine nazar aýdardy.
