Aral aýdanynyń ákimi qurylysy aıaqsyz qalǵan saıabaqqa qatysty túsinik berdi
QAZALY. QazAqparat - Aral aýdany Sekseýil kentinde qurylysy aıaqsyz qalǵan saıabaqtyń qazirgi hali múshkil, dep habarlaıdy QazAqpart tilshisi.
Áý basta bul jer jasyl jelekke oranyp, kópshilik serýendeıtin orynǵa aınalady dep josparlanǵan bolatyn. Abattandyrýǵa bólingen aýmaqtyń jobalyq quny 125 mln teńgeni quraǵan edi. Alǵashynda 5 mln teńge qarjy bólinip, oǵan tıisti jumystar júrgizilgen. Dese de, merdigerler mejelengen jumystardy tolyq oryndamaǵan. Jaqynda ǵana jýrnalıstermen júzdesken Aral aýdanynyń ákimi Muhtar Orazbaev bul másele boıynsha qajetti sharalar atqarylatynyn aıtty.
«Bıyl aýdandaǵy tirekti eldi mekenderdi odan ári damytý josparda tur. Onyń ishinde Sekseýil kenti de bar. Jalpy, ótken jyly Aral qalasynda oblys ákiminiń qoldaýymen rámizder alańy ashyldy. Al aýdan ortalyǵyndaǵy shaǵyn rámizder alańyn Sekseýil kentine kóshirip, álgi aýmaq abattandyrylyp, jaryqtandyrý jumystaryn júrgizý kózdelgen. Bıyl qolǵa alatyn bolamyz»,- dedi M.Orazbaev.
Aıta keteıik, búgingi tańda saıabaqtyń aýmaǵy tolyq qorshalǵan. Jaqynda kent jastary bul jerdi «Jastar saıabaǵyna» aınaldyrsa degen usynys kótergen edi.
