Aral aýdanynda túıeler tabanynyń túsý jaǵdaıy tirkeldi

QYZYLORDA. QazAqparat - Qyzylorda oblysy, Aral aýdanynyń úsh aýylynda bıylǵy jyldyń maýsym aıynyń sońǵy on kúndiginde túıeler tabanynyń túsýine ushyratqan aýrý kezdesti, dep habarlaıdy QazAqparat tilshisi.

Qazirgi tańda jergilikti veterınarııa salasynyń mamandary aýrý belgilerin anyqtap, oǵan qatysty bılik tarapynan jedel sharalar qabyldandy.

Aýdanǵa qarasty Aqqum, Qaraqum aýyldyq okrýgteri jáne Jaqsyqylysh kentinde 24 túıeniń atalǵan aýrýmen syrqattaǵan jaǵdaıy tirkeldi. Veterınar mamandar túıelerge klınıkalyq tekserý júrgizip, «Nekrobakterıoz» boljamdy dıagnozyn qoıyp otyr. Ol asa qaýipti aýrý túrlerine jatpaıdy.

«Atalǵan aýrýǵa janýarlardyń barlyq túri ushyraýy múmkin. Ol qajetti jem-shóp qoreginiń azdyǵynan, qýańshylyqtyń bolýynan týyndaıdy. Máselen, ol qystan aryq, kóterem bolyp shyqqan, ımmýnıteti tómen maldarda jıi kezdesedi. Ol aýyrǵan túıelerdiń tabanyn zaqymdap, mazoldi qabatyn buzyp túsiredi. Sondaı-aq, laıly-shalshyq jerlerde, kóktemde qora-jaılarǵa mehanıkalyq antısanıtarlyq jumystardyń júrgizilmeýinen de paıda bolady.

Veterınar dárigerler aýyrǵan túıelerdi emdeý úshin túrli antıbıotıkterdi qoldanýda», - dedi oblystyq veterınarııa basqarmasy basshysynyń orynbasary Ánýarbek Darmaǵanbetov.

Onyń aıtýynsha, bul maqsatta «Bıtsıllın-3», «ASD fraktsııa-3» eritindisi, «Ashoksı», «Nıtoks-200» veterınarııalyq preparattaryn maldarǵa egý júrgizilýde. Preparattar mal ıesiniń óz qarajaty esebinen egilýde. Oǵan shamaman 8-10 myń teńgege deıin qarajat jumsalady.

Qazirgi kúni aýyrǵan túıe maldarynyń jaǵdaıy qalypty deńgeıde. Aýyrǵan 24 bas túıeniń búginde 14-i saýyqqan. Al, qalǵan 10 bas túıege emdik sharalary júrgizilýde.

Búgingi kúni veterınar mamandar mal ıelerine emdeý protsesin tegin júrgizip jatyr. Mal aýrýlary turaqty baqylaýǵa alynǵan.

Aıta keteıik, aýrý belgileri anyqtalǵan túıelerden qosymsha synama alynýda. Synamalar respýblıkalyq veterınarlyq zerthananyń Qyzylorda oblysyndaǵy fılıalyna tapsyrylady.