Aral aýdanynda Ózbekstannan kelgen alaıaq áıelderdiń toby quryqtaldy - Qyzylorda oblysy
QYZYLORDA. Qyrkúıektiń 24-i. QazAqparat /Jańagúl Serdaly/ - Qyzylorda oblysy Aral aýdanynda ózderin joǵary tylsym kúshi bar emshiler retinde kórsetip, jurttyń senimine kirip alyp, sońynan olardy tonap ketip júrgen tórt áıelden quralǵan qylmystyq top quryqtaldy.
Kórshiles Ózbekstan azamatshalary bolyp tabylatyn bul tórteýdiń eń úlkeniniń jasy 43-te bolsa, eń jasy áli kámeletke de tolmaǵan kórinedi. Olar ózderi keletin úıdiń aldyna aldyn-ala tyrnaq pen shash sekildi zattardy kómip qoıyp, olardy artynan ashyp shyǵaryp, úı ıelerin aldap soǵyp otyrǵan. Al ár seanstary úshin 20-40 myń teńge aralyǵynda teńge alatyn bolǵan.
Kvartet músheleri qashyp bara jatqan jerlerinde jol polıtsııasy qyzmetkerleri qolǵa túsirdi. Qazir olardyń ústerinen alaıaqtyq boıynsha qylmystyq is qozǵaldy.
