Aral aýdanynda aýdarylǵan avtobýsqa baılanysty jańa derekter anyqtaldy
QYZYLORDA. QazAqparat - «Shymkent-Samara» tas jolynyń Aral aýdany mańyndaǵy bóliginde aýdarylyp qalǵan avtobýsqa qatysty jańa derekter belgili boldy, dep habarlaıdy QazAqparat tilshisi.
Budan buryn habarlaǵanymyzdaı, oqıǵa 22 qarashada keshki saǵat 20:40 shamasynda Aral qalasyna 52 shaqyrym qashyqtyqta bolǵan. Avtobýs júrgizýshisi - 1979 jyly dúnıege kelgen Túrkistan oblysy Saryaǵash aýdanyna qarasty Jańatalap aýylynyń azamaty. Ol joldyń taıǵaq bolýy saldarynan kólikke ıe bola almaı qalǵan. Atalmysh avtobýsta 34 Ózbekstan azamaty jáne avtobýs júrgizetin 2 Qazaqstan azamaty bolǵan. Jolaýshylar Reseı Federatsııasynyń Nıjnıı Novgorod qalasynan qaıtyp kele jatqan.
«Atalmysh oqıǵa saldarynan Aral aýdandyq aýrýhanasynyń jan saqtaý bóliminde 1986 jyly dúnıege kelgen Zokır Rozımýroduly Ahrarov qaıtys boldy. Ol - Ózbekstannyń Samarqand oblysynyń turǵyny. Al avtobýs júrgizýshisi 39 jastaǵy azamat oń jaqtaǵy eki qabyrǵasy synyp, aýdandyq aýrýhananyń tramvotologııa bólimshesine jatqyzyldy», - dedi oblystyq jumyldyrý daıyndyǵy basqarmasynyń basshysy Asylbek Shámenov.
Oqıǵa saldarynan jeńil jaraqat alǵan 7 jolaýshyǵa aýrýhananyń qabyldaý bóliminde medıtsınalyq kómek kórsetildi. Qalǵan jolaýshylar jol boıynda ornalasqan qonaq úıge ornalastyryldy.
Jol apaty oryn alǵan aýmaqqa Aral aýdany ákimdiginiń, aýdandyq polıtsııa bóliminiń, aýdandyq tótenshe jaǵdaılar basqarmasynyń qyzmetkerleri jáne arnaıy qyzmetterdiń 10 tehnıkasy oqıǵa ornyna shuǵyl jetti.
Esterińizge sala ketelik, budan buryn habarlaǵanymyzdaı, 16 qarashada Qyzylorda oblysynyń Qarmaqshy aýdanynda eki avtobýs soqtyǵysyp, 3 adam adam qaıtys bolǵan edi. Olardyń 2-eýi oqıǵa ornynda qaıtys bolǵan. Qaıtys bolǵandardyń biri 1964 jyly dúnıege kelgen bolsa, ekinshisi 1997 jylǵy oblys turǵyny. 2011 jylǵy bala Qarmaqshy aýdandyq aýrýhanasy jansaqtaý bólimine jetkizilgenmen dárigerler onyń ómirin saqtap qala alǵan joq.
Odan bólek, qazan aıynyń basynda Syr óńirinde jeńil kóliktiń júk kóligine soǵylýy saldarynan 4 adam qaıtys bolǵan edi.
