Aral aýdanynda adam óltirgen 32 jastaǵy qaraqshy Qylmystyq kodekstiń úsh baby boıynsha aıyptalýda
QYZYLORDA. 22 maýsym. QazAqparat - Qyzylorda oblysy Aral aýdanynda turǵyn úıge urlyqqa túsip, adam óltirgen 32 jastaǵy azamatqa qatysty qylmystyq is qozǵaldy.
Bul týraly oblystyq ishki ister departamenti baspasóz qyzmetiniń bas mamany Erqanat Sársenbaı habarlady.
Polıtsııa qyzmetkerleri kisi ólimine qatysy bar kúdiktini kóp uzamaı ustady. Ol Aral aýdanynyń 1981 jyly týǵan turǵyny bolyp shyqty. Kúdikti 13 mamyr kúni Aral qalasyndaǵy temir qabyldaıtyn bir úıge baryp, ala kelgen metalyn ótkizedi. Osy ýaqytta kúdikti metall qabyldaıtyn úı ıesiniń temirlerdi júk kóligine artyp, ótkizýge daıyndap jatqanyn kóredi.Jáne eki kúnnen soń olardy ótkizip, úıine aqshamen oralatynyn bilgen.
Sol kúni túnde qylmystyq oıyn júzege asyrý úshin temir qabyldaýshynyń úıine keledi. Sharbaǵynan sekirip túsken ol úı telefonynyń symyn úzip, terezeni qaǵady. Úı ıesi shyqqan kezde kúdikti júrek tusynan bir márte uryp, dene jaraqatyn salǵan. Munan soń eki ret pyshaq suqqan. Jábirlenýshi úıinen alyp shyqqan tapanshasymen ata bastaǵanda, kúdikti onyń keýdesine taǵy da pyshaq salady.
Bolǵan oqıǵany kórip turǵan jábirlenýshiniń áıelin baıqaǵan kúdikti úıge júgire kirip, esiktiń ilmeshegin julyp ashady. Sosyn ekinshi bólmeniń esigin bekitip alǵan áıeldi qorqyta bastaıdy, óltirmekke áreket jasaıdy. Osy kezde jábirlenýshilerdiń kórshisi kelip, qaqpany urady, kúdikti oqıǵa ornynan qashyp ketedi.
Kúdikti búgingi tańda qamaýǵa alynyp, tergeý amaldary júrgizilýde. Onyń ústinen QR QK-niń 179-baby 2-bóliginiń «v», «g» tarmaqtarymen jáne 96-baby 2-bóliginiń «d» tarmaǵymen, 24-baby 3-bóligi, 96-baptyń 2-bóligi «z», «k» tarmaqtarymen qylmystyq is qozǵaldy.
