Aral aýdanynda 101 mln teńgege eki dárigerlik ambýlatorııa boı kóterdi
QYZYLORDA. QazAqparat - Bıylǵy jyl medıtsınalyq qyzmet kórsetýde 80 myńnan astam halqy bar Aral aýdanynyń turǵyndary úshin sátti bastalýda.
Densaýlyq saqtaý salasy boıynsha birneshe jańalyqtar oryn alyp, medıtsınalyq kómektiń qoljetimdiligi artýda. Búgin Aral aýdanynyń Amanótkel, Qaratereń aýyldarynda jańadan salynǵan dárigerlik ambýlatorııalar paıdalanýǵa berildi, dep habarlady QazAqparat HAA tilshisi oblystyq densaýlyq saqtaý basqarmasyna silteme jasap.
Quny 101 mln teńgeden astam qarjyny quraıtyn ǵımarttar zaman talabyna saı jabdyqtalǵan. Dárigerlik ambýlatorııalarda 15 medıtsına qyzmetkeri jumys jasaıdy. 10 tósek orynǵa arnalǵan kúndizgi emdeý bólimi ashylǵan, dári-dármektermen tolyq qamtylǵan.
Emdeý mekemeleriniń saltanatty ashylýyna qatysqan oblystyq densaýlyq saqtaý basqarmasynyń basshysy Aqmaral Álnazarova men Aral aýdany ákimi Muhtar Orazbaev, sondaı-aq aýyl turǵyndarymen kezdesti. Jergilikti atqaminerler aýyldyqtardyń usynys-pikirlerin tyńdaı otyryp, keler jyldan bastap engiziletin mindetti áleýmettik-medıtsınalyq saqtandyrýǵa baılanysty týyndaǵan saýaldarǵa jaýap berdi.
Basqarma basshysy osy kúni, sonymen qatar aýdan ortalyǵynda bolyp, kópten beri mezgil máselesinen túspeı turǵan, 150 oryndyq aýdandyq aýrýhana qurylysynyń bastalý jumystarymen tanysty. Qurlysqa respýblıka bıýdjetinen 4 mlrd teńge qarajat bólingen. Osylaısha apattyq jaǵdaıda turǵan aýdandyq aýrýhananyń máselesi sheshilip otyr.
Jáne bir jańalyq, Aral qalasynda oblystyq narkologııa ortalyǵynyń fılıaly jańadan ashylyp, emdeý ornynda 20 medıtsına qyzmetkeri jumyspen qamtyldy.
Sonymen qatar, aqpan aıynyń basynda Aral aýdandyq aýrýhanasy janynan memlekettik-jekemenshiktik seriktestik aıasynda «jasandy búırek» bólimi ashylyp, qazirgi ýaqytta osy syrqatqa shaldyqqan 12 naýqas emderin qabyldaýda. Bul - aptasyna 3 ret em alýǵa tıisti jandardyń oblys ortalyǵyna baryp, em qabyldaýlaryn jeńildetip otyr.
Basqarma basshysy aýdan turǵyndarymen kezdesip, Memleket basshysynyń tapsyrmasy boıynsha Ult jospary - bes ınstıtýtsıonaldyq reformany júzege asyrý jónindegi «100 naqty qadamynyń» aıasynda, mindetti áleýmettik-medıtsınalyq saqtandyrýǵa baılanysty týyndaǵan saýaldarǵa keńinen toqtalyp ótti. Aral aýdanda densaýlyq saqtaý máseleleriniń sheshimin tapqandyǵy jáne aldaǵy kezeńderde medıtsınalyq uıymdardyń zamanaýı jabdyqtalýy, mamandarmen qamtamasyz etilýi jolǵa qoıylatyndyǵy atap ótildi.
