Aral aýdanyna jyl basynan 8,5 mlrd teńgeden astam ınvestıtsııa tartyldy
QYZYLORDA. QazAqparat - Qyzylorda oblysy Aral aýdanyna jyl basynan beri 8,5 mlrd teńgeden astam ınvestıtsııa tartyldy, dep habarlaıdy QazAqparat tilshisi.
Bıyl aýdan bıýdjetiniń naqtylaǵan jalpy túsimderi 20,7 mlrd teńgeni qurady. Bul – aýdan qazynasynyń óskeniniń dáleli. Jyl basynan beri ónerkásip oryndary 11,3 mlrd teńgeniń ónimin óndirgen. Aýdan boıynsha 542 612 tonna tuz, 2 803 tonna balyq, 209 tonna et, 847 tonna nan jáne un ónimderi shyǵaryldy.
«Aýdanda «Indýstrııalyq-ınnovatsııalyq damý» memlekettik baǵdarlamasy aıasynda 1379 adam turaqty jumyspen qamtylatyn 9 joba júzege asýda. Sondaı-aq, «Dıplommen aýylǵa» memlekettik baǵdarlamasy aıasynda 30 jas mamanǵa bir jolǵy kóterme járdemaqy alý úshin arnaıy qarjy qarastyryldy. Aýdanda baǵany turaqtandyrý máselesi de basty nazarda. Áleýmettik mańyzy bar 19 túrli azyq-túlik baǵalaryna monotorıng turaqty júrgizilýde. Azyq-túlik taýarlaryn jetkizetin jeke kásipkerlermen jyl saıyn yntymaqtastyq memorandým jasalyp turady», - dedi Aral aýdanynyń ákimi Serik Sermaǵanbetov.
Aıta ketý kerek, keler jyly azyq-túlik taýarlaryn óndirý boıynsha 9 joba júzege asyrý josparlanýda. Atap aıtqanda, olardyń qatarynda sút ónimderi, makaron, jartylaı fabrıkat (kespe, jaıma), qurǵatylǵan jemister, 2 jylyjaı bar.
Eske salsaq, Qyzylorda oblysynda tirekti eldi mekenderdi gazǵa qosý qarqyndy júrgizilýde.
