Araqty zańsyz jasaıtyn 47 tseh anyqtaldy - QR Qarjy mınıstrligi
«2017 jyly alkogol ónimderiniń zańsyz aınalymyna qatysty 217 qylmystyq quqyq buzýshylyq tirkeldi, 173 qylmystyń beti ashyldy. 2016 jylmen salystyrǵanda tirkelgen qylmys jáne tárkilengen, esepke ilikpegen alkogol ónimderiniń ósýi baıqalady. Bul turǵyda, osy faktilerdi anyqtaýǵa Memleket basshysynyń tapsyrmasy boıynsha 2017 jylǵy qazanda uıymdastyrylǵan aýqymdy tekserý kómegin tıgizdi. Sonymen qatar, atqarylǵan jumys bıýdjetke túsimderdiń aýdarylýyna oń áserin tıgizdi, olardyń somasy 2016 jylǵy 29 mlrd teńgeden 41 mlrd teńgege deıin nemese 30 paıyzǵa ósti», - dep atap ótilgen vedomstvonyń málimetinde.
Belgili bolǵandaı, alkogol ónimderin daıyndaý jónindegi 47 jasyryn tsehtyń joly kesildi, olardyń negizgi kólemi Almaty qalasynyń (13) jáne Almaty oblysynyń (11) aýmaqtarynda ornalasqan.
«Kóleńkeli aınalymnan 8 698 007 dana alkogol ónimderiniń shólmegi, 3 457 752 jalǵan esepke alý-baqylaý markalary, sondaı-aq 345 867 lıtr spırt tárkilendi», - delingen mınıstrliktiń habarlamasynda.
Tárkilengen alkogol ónimderiniń eń kóp sany kelesi óndirý zaýyttaryna tıesili: «Evrazııa Elıt» JShS (OQO) - 1 033 322 shólmek; «Maksımýs» JShS (Aqtóbe) - 270 188 shólmek; «Geom» JShS(Aqtóbe) - 824 643 shólmek; «BN» JShS (Almaty oblysy) - 540 380 shólmek; «PVZ» JShS - 3 235 427 shólmek.
Aıaqtalǵan qylmystyq ister boıynsha belgilengen zııan 663,9 mln teńgeni qurady, onyń 42,5 mln teńgesi óndirip alyndy.
Esterińizge sala keteıik, osy aqpan aıynda Úkimettiń keńeıtilgen májilisinde Prezıdent Nursultan Nazarbaev alkogol ónimderiniń kóleńkeli aınalymymen kúresti synǵa alǵan bolatyn.
