Araqashyqtyq kedergi emes: Danııa syrtqy ister mınıstri Qazaqstanmen qarym-qatynas týraly

Lars Lekke Rasmýssen 2009 jyldan beri Qazaqstanǵa kelip turǵan Danııadaǵy birinshi mınıstr eken. Sózinshe, onyń Qazaqstanǵa sapary Danııanyń ekijaqty qarym-qatynasty damytýǵa degen nıetin kórsetedi.

Ol Carlsberg kompanııasynyń Almaty oblysyndaǵy jańa óndiris ornynyń ashylýymen quttyqtady. Aıtýynsha, quny 344 mıllıon dollar bolatyn joba eki el arasyndaǵy yntymaqtastyqtyń qandaı nátıjelerge ákeletinin kórsetti.

- Qazaqstan men Danııa geografııalyq turǵydan bir-birinen alys ornalasqan memleketter bolǵanymen, bul birlesip jumys isteýge kedergi emes. Búgin ashylǵan jańa kásiporyn – sonyń aıqyn dáleli. Eń bastysy – birge jumys isteýge degen nıetimiz, bir-birimizge degen senim jáne uzaq merzimdi seriktestikke daıyndyǵymyz. Búgin biz sonyń naqty úlgisin kórip otyrmyz, - dedi Danııa syrtqy ister mınıstri.

Rasmýssen Qazaqstannyń áleýetin óte joǵary baǵalaıtynyn jáne bul el Ortalyq Azııadaǵy ekonomıkalyq ósimi joǵary memleketterdiń biri ekenin atap ótti. Sol sebepti Carlsberg syndy iri kompanııalar Qazaqstanǵa qyzyǵýshylyq tanytyp, qomaqty ınvestıtsııa salyp jatyr. Ol muny jaı aqsha berý emes, uzaq merzimdi mindetteme retinde kóretinin aıtady.

- Eki el arasyndaǵy berik ári uzaq merzimdi qarym-qatynastardy negizinen kompanııalar jáne ınvestıtsııalar qalyptastyrady. Danııalyq kompanııa Qazaqstanǵa ınvestıtsııa salǵanda, ol aqsha ǵana emes, tehnologııa, tájirıbe, jumys oryndary jáne, eń mańyzdysy, eldiń bolashaǵyna degen senimdi arqalap keledi. Seriktestik osylaısha naqty iske, iri jobaǵa aınalady, - dedi ol.

Carlsberg Qazaqstanda otyz jyldan beri jumys istep keledi. Al bul jańa joba taǵy 200 jumys ornyn ashýǵa múmkindik beredi. Mınıstr Carlsberg-tiń bul ınvestıtsııasy Qazaqstanǵa basqa da danııalyq kompanııalardyń qarjy quıýyna jol ashady degen úmitte.

- Aýdandyq ta, óńirlik deńgeıde de jobaǵa qoldaý kórsetildi. Osy rette jergilikti bılik organdaryna alǵys aıtqym keledi. Jas kezimde ózim de ákimdikte jumys istegenmin. Sondyqtan bul jobanyń bir jyldan az ýaqyt ishinde júzege asyrylǵanyna óte qatty tańǵaldym. Osylaısha Qazaqstannyń bıznes úshin jaǵdaı qalyptastyra alatynyn kórdik, - dedi sheteldik sheneýnik.

Ol kásiporynda paıdalanylatyn barlyq ónimniń 70%-y jergilikti óńirde óndiriletinine mán berdi. Bul óz kezeginde qosymsha ekonomıkalyq belsendilikti qalyptastyryp, jańa múmkindikterge jol ashady deıdi.

- Bul – eki tarapqa da tıimdi yntymaqtastyq. Sebebi joba Qazaqstannyń ekonomıkasyna, sonyń ishinde óńir ekonomıkasyna úles qosyp qana qoımaı, Danııadaǵy bıznestiń damýyna da mańyzdy serpin beredi, - dep atap ótti ol.

Danııa syrtqy ister mınıstriniń Qazaqstandaǵy jospary

1 qazan mártebeli qonaq zaýyt ashylýynan bólek Qonaevta ótetin iri Qazaqstan-Danııa bıznes forýmyna qatysady.

Al 2 qazan Astanada Lars Lekke Rasmýssen Qasym-Jomart Toqaevpen jáne Syrtqy ister mınıstri Muhtar Tileýberdimen kezdesedi. Kezdesýden keıin Saýda-ekonomıkalyq jáne ınvestıtsııalyq yntymaqtastyq jónindegi ekijaqty komıssııa qurý jáne ózara túsinistik týraly memorandýmǵa qol qoıylmaq.

- Danııa men Qazaqstan arasyndaǵy kelissózder Eýropalyq Odaqtyń Ortalyq Azııamen qarym-qatynasty keńeıtý nıetimen úndesedi. Kezdesýlerde Danııanyń ǵana emes, Eýropalyq Odaqqa múshe basqa elderdiń de Ortalyq Azııadaǵy qyzmetin ári qaraı keńeıtýge baǵyttalǵan memorandýmdarǵa qol qoıý josparlanyp otyr, - dedi Lars Lekke Rasmýssen.

Eske salsaq, danııalyq FLSmidth Qazaqstandaǵy óndiristi lokalızatsııalaýǵa ınvestıtsııa quıatyny habarlandy.