Araq-sharaptyń aktsız stavkalary kóteriletin bolady - Parlament
Aıta keterligi, Parlament qabyldaǵan osy zań «100 naqty qadam» Ult Josparynyń 39-, 65- jáne 67-qadamdaryn iske asyrý, sondaı-aq salyqtyq jáne kedendik ákimshilendirý tetikterin jetildirý jolymen qolaıly kásipkerlik ortany qalyptastyrý maqsatynda ázirlengen bolatyn.
Zańda salyq saıasaty boıynsha birqatar sharalar qamtylyp otyr. Máselen, qosylǵan qun salyǵy boıynsha tirkeý esebine turýdyń shekti mólsherin 59,4 mln. teńgeden 6,4 mln. teńgege tómendetý, taýarlardy ımporttaý kezinde qosylǵan qun salyǵy esepke alý ádisimen tólenetin normalardyń qoldanylý merzimin 2022 jylǵa deıin uzartý, jeke kásipker retinde tirkeý alymyn tóleýdi alyp tastaý qarastyrylady. Budan bólek, geologııalyq barlaý jumysy kezeńi ishinde jınalǵan qosylǵan qun salyǵyn bes jyldyń ishinde qaıtarý kózdelip otyr.
Májilis depýtaty Serik Ospanovtyń aıtýynsha, Senat tarapynan qujatqa 5 túzetý engizgen. Olardyń ishinde bir túzetý alkogol ónimine konıak, brendı, sharap, sharap materıaly, syra jáne syra sýsynynan basqa aktsızder stavkasyn qaıta qaraý usynylady.
«Aıta keterligi, zań jobasyn Májiliste qaralǵanda Keden odaǵyndaǵy áriptes elderde qabyldanǵandaı, alkogol ónimine salyqtyń qoldanystaǵy aktsız stavkasyn kelesi úsh jylǵa ózgerissiz qaldyrý jónindegi túzetý depýtattar tarapynan engizilgen. Biraq ol ýaqytta Úkimet ondaı sharaǵa daıyn bolmaǵandyqtan, óziniń qorytyndysymen Májilis depýtattarynyń bastamasyn qoldamady. Zań jobasyn Senatta qaraý barysynda Úkimet óz sheshimin qaıta qarap, alkogol ónimine aktsız stavkasyn kútilip otyrǵan 30 paıyzdyq ósimnen Senatpen usynylǵan qoldanystaǵy stavkany 10-ǵa emes, 15 paıyzǵa ulǵaıtý jóninde sheshim qabyldady. Osyǵan oraı, Senat engizgen túzetýlermen kelisýge bolady dep esepteımiz», - dedi depýtat Serik Ospanov.
Tutastaı alǵanda, qujatty qabyldaý, eń aldymen, qolaıly bıznes-ortany qurýǵa, memlekettiń strategııalyq maqsattaryn iske asyrýǵa jáne odan ári turaqty áleýmettik-ekonomıkalyq damýy úshin yqpal etetin bolady.
