Araq-sharaptan bas tartqan Mańǵystaý oblysyndaǵy aýyl saılaý kúni de erekshelendi

AQTAÝ. QazAqparat - Mańǵystaý oblysyndaǵy Baıandy aýylynyń turǵyndary saılaý ýchaskelerine jappaı qazaqtyń ulttyq kıimimen kelýde. Er azamattar ıyǵyna oıýly shapandaryn japsa, qyz-kelinshekter kájekeı, qamzolyn kıip, saıası sharanyń sánin keltirdi, dep habarlaıdy QazAqparat mangystaumedia.kz-ke silteme jasap.

Daýys berýge ulttyq kıim kıip barýdy aýyldyń aq jaýlyqty analary kótergen. Bul ıdeıany aýyl jurtshylyǵy jyly qabyldap, kópshilikten qoldaý tapty.

«Qarańyzdarshy qandaı ádemi, bárine jarasyp tur. Ata-babalarymyzdan mura bolyp jetken asyl qazynalarymyzdyń biri – oıý-órnekti ulttyq kıim kııý – estetıkalyq sán ǵana emes, halqymyzdyń mol taǵylymdy ulaǵatyn, ónegeli tálim-tárbıesin, baı ulttyq bolmysymyzdy nasıhattaý bolyp tabylady. Osyny jastardyń sanasyna sińirý ǵoı basty maqsat», - deıdi aýyldaǵy ájeler keńesiniń tóraıymy Aqkúmis Dúısenbaeva.

8 myńnan astam turǵyny bar Baıandy aýylynda 4406 saılaýshy tirkelgen. Olar orta mektepke ornalasqan qos saılaý ýchaskesinde óz tańdaýyn jasap jatyr. Saılaý ýchaskelerinde qazaqtyń kúıleri kúmbirlep, turǵyndardyń ulttyq rýhyn kótere túskendeı.

«Ulttyq bolmysymyzdy saqtap qalý - ulttyq tárbıeden bastalady ǵoı. Osydan 1 aı buryn aýyl turǵyndary bolyp ishimdikten basy bútin bas tarttyq. Atqarýshy bılik, quqyq qorǵaý organdary men aýyl kásipkerleri ókilderi alkogol ónimderin satýǵa jáne satyp alýǵa jol bermeý boıynsha ózara yntymaqtastyq týraly memorandýmǵa qol qoıdyq. Bul qadam qylmystyń azaıýyna kómektesedi dep úmittenemiz. Qazir aýyl tynysh. Jastar paıdaly istermen aınalysýda», - dedi aýyl ákimi Dastan Muratalıev.