Araǵa 18 jyl salyp Qazaqstannyń grek-rım balýandary álem chempıonatynyń fınalısteri atandy
ASTANA. QazAqparat - 18 jyl ótken soń grek-rım stıli boıynsha qazaqstandyq eki balýan álem chempıonatynyń fınalısteri atandy, dep habarlaıdy QazAqparat.
Frantsııanyń Parıj qalasynda kúres túrlerinen ótip jatqan álem chempıonatynda grek-rım kúresinen Qazaqstan sportshylary 2 kúmis medal ıelendi.
Budan buryn habarlanǵandaı, álem chempıonatynyń alǵashqy kúninde Qazaqstan qorjynyna kúmis júlde tústi. 71 keli salmaqta fınaldyq básekede qazaqstandyq Demeý Jadyraev ekinshi oryndy enshiledi. Ókinishke qaraı, ol germanııalyq Frank Shteblerge 3:8 esebimen ese jiberip aldy. Álem birinshiligindegi «kúmis» júlde jolynda Demeý Norvegııa, Reseı, Qyrǵyzstan jáne Majarstan sportshylarynan basym tústi.
Sonymen qatar grek-rım kúresinen 59 keli salmaqta synǵa túsken balýanymyz Meırambek Aınaǵulov Qazaqstan qorjynyna ekinshi «kúmisti» saldy. Meırambek fınalǵa deıin súrinbegen bolatyn. Sońǵy tartysty básekede japonııalyq Kenıchıro Fýmıtoǵa 1:2 esebimen ese jibergen aqtóbelik M.Aınaǵulov kúmis júldeni qanaǵat tutty. Qazaqstandyq balýan bıylǵy Azııa chempıonatynyń fınalynda da osy K.Fýmıtodan tóreshilerdiń sheshimimen dál osyndaı eseppen utylǵan bolatyn. Atap aıtqanda, japondyq aıyp upaıynyń esebinen ǵana otandasymyzdyń aldyn orap ketti.
Osy jetistikti jankúıerler uzaq kútti. Óıtkeni álem chempıonatynda Qazaqstan atynan fınalǵa eki sportshy qatarynan sońǵy ret 1998 jáne 1999 jyldary shyqqan edi.
Bul nátıjeler bapkerler shtaby, Grek-rım, erkin jáne áıelder kúresi federatsııasy, Sporttyq jekpe-jek jáne kúsh qoldanylatyn sport túrleri konfederatsııasy, QR Sport jáne mádenıet mınıstrligi eńbeginiń, sondaı-aq barsha komanda qosqan úlestiń arqasynda múmkin boldy.
