Arabtar ońtústikte qoqys óńdeıtin zaýyt salmaq
ShYMKENT. QazAqparat - Birikken Arab Ámirliginiń «Schneider & Danzey FZC» kompanııasy Ońtústik Qazaqstan oblysynan turmystyq qatty zattardy qaıta óńdeýden ótkizetin zaýyt qurlysyn salýǵa nıetti. Bul týraly atalǵan kompanııanyń basshylary Iorga Shnaıder men Kreıg Denzıdiń Ońtústik Qazaqstan oblysynyń ákimi Janseıit Túımebaevpen kezdesýinde málim boldy, dep habarlaıdy QazAqparat HAA tilshisi.
Kezdesý barysynda qonaqtar óńir basshysyna kompanııa týraly tolyq aqparat berip, iske asyrylǵaly otyrǵan ınvestıtsııalyq jobasyn tanystyrdy. 25 jyldyq tarıhy bar kompanııa túrli salalarda eńbek etedi. Negizinen bıznes jobalardy ázirlep, ınvestıtsııalyq iri qurylymdardy qurýǵa járdemdesedi. Kompanııanyń bas ǵımaraty Birikken Arab Ámirliginiń Ras-Al-Haıma qalasynda ornalasqan.
«Bizdiń maqsatymyz - Ońtústik Qazaqstan oblysynan turmystyq qatty zattardy qaıta óńdeýden ótkizetin zaýyt salý. Bul rette bizdiń kompanııa negizgi eki baǵytta jumys isteýdi kózdep otyr. Onyń alǵashqysy - turmystyq qaldyqtardy qaıta óńdeý bolsa, ekinshisi - jasyl ekonomıka salasyn damytý. Atalǵan eki joba da ekologııaǵa zııansyz ári eki jaqqa da óte tıimdi dep oılaımyz», - dedi Iorga Shnaıder.
Sheteldik qonaqtardyń ınvestıtsııalyq jobasymen tanysqan oblys basshysy óńirdiń ekonomıkalyq áleýetin baıandap, ınvestorlarǵa memleket tarapynan kórsetiletin jeńildikterdi túsindirdi.
«Turmystyq qaldyqtardy óńdeý boıynsha oblysymyzǵa buǵan deıin de birneshe usynystar kelip túsken bolatyn. Alaıda olardyń birqatary qaǵaz júzinde iske aspaı qaldy. Oǵan birqatar sebepter bolǵany da jasyryn emes. Endigi másele - atalǵan zaýyttyń qurylysyn tezdetip bastap, iske asyrý óte mańyzdy. Bul rette jergilikti bılik arnaıy jumysshy tobyn quryp, atqarylatyn sharýalardyń kestesi túzilýi tıis», - dedi J. Túımebaev.
Aıta keteıik, búginde oblys halqynyń sany kún sanap artyp keledi. ıAǵnı, tutynýshy bar jerde qoqystyń da arta túsetini zańdylyq. Osy máselege toqtalǵan óńir basshysy atalǵan zaýytty Túrkistan men Kentaý qalalary tóńireginnen nemese Saryaǵash, Maqtaral aýdandarynyń mańynan salýdy usyndy. Qonaqtar oblys basshysynyń bul usynysyn qabyl alyp, atalǵan aýmaqtarǵa arnaıy baryp tanysyp qaıtýǵa nıetti ekendikterin jetkizdi.
