Arabtar Izraılmen kelissózdiń múmkin emestigin málim etti
ASTANA. Naýryzdyń 11-i. QazAqparat - Arab memleketteriniń lıgasy Izraıl men Palestınanyń arasynda beıbit kelissózdiń múmkin emes ekendigin málim etti.
Bul málimdemege Ierýsalımniń shyǵysynda taǵy 1,6 myń jańa úı salý týraly sheshimi sebep bolyp otyr. Palestına avtonomııasynyń basshysy Mahmud Abbas ta óz kezeginde, Palestınanyń sheteldik araǵaıyndar arqyly Izraılmen qandaı da bir kelissóz júrgizbek emes ekenin málim etti.
Palestınalyqtar osydan birneshe kún buryn AQSh-tyń araǵaıyndyǵymen tikeleı emes kelissózdi bastaýǵa kelisim bergen bolatyn. Osy maqsatta aımaqta amerıkan vıtse-prezıdenti Dj.Baıden kelgen edi. Bul jerde ızraıl ókimeti men palestınalyq arabtardyń múddelerin qorǵaýshy FATH sııaqty salmaqty uıymdardyń arasyndaǵy qarym-qatynas týraly sóz bolyp otyr. «Hamas» radıkaldy toby Izraılmen kelissózden úzildi-kesildi bas tartyp keledi.
Dj.Baıden Ierýsalımniń shyǵysynda taǵy 1,6 myń jańa úı salý týraly sheshimi úshin Izraıldi synǵa aldy. Onyń aıtýynsha, ızraıldyqtardyń bul áreketteri áreń qol jetkizilip otyrǵan senimdi buzyp otyr. Iordan ózeniniń Batys jaǵalaýy men Shyǵys Ierýsalımde evreı qonystarynyń salynýy Taıaý Shyǵystaǵy qaqtyǵysty retteýdiń basty kedergisi bolyp tabylady. Palestınalyqtar bul aýmaqtardy ózderiniki dep sanaıdy jáne Izraılden barlyq eldimekenderin kóshirip áketýdi talap etýde. Ótken jyldyń qyrkúıek aıynda Izraıl qurylystardy 10 aıǵa toqtatýǵa kelisken bolatyn.
