Arabtar elimizdiń aýyl sharýashylyǵy salasyna ınvestıtsııa salmaq

NUR-SULTAN. QazAqparat –Qazaqstannyń Saýd Arabııasyndaǵy elshisi Berik Aryn Saýdtyq aýyl jáne mal sharýashylyǵy salasyndaǵy ınvestıtsııalyq kompanııanyń (SALIC) basshysy Mettıý Djensenmen kezdesti. Bul týraly QazAqparat SІM silteme jasap habarlaıdy.

Kezdesý barysynda Qazaqstan men SALIC arasynda yntymaqtastyq ornatý, elimizdiń aýyl sharýashylyǵy salasyna saýd ınvestıtsııalaryn tartý máselesi talqylandy.

Osy rette Elshi Qazaqstannyń aýyl sharýashylyǵy men agro-ónerkásip kesheni týraly keńinen áńgimelep, bul salalardy damytý baǵytynda Úkimet tarapynan qabyldanyp jatqan sharalar týraly aqparattandyrdy. Sonymen qatar ol elimizde sheteldik ınvestorlarǵa beriletin jeńildikter, olardyń quqyqtary men ınvestıtsııalaryn qorǵaıtyn zańnama men tetikter jóninde aıta otyryp, kompanııa basshylyǵynyń nazaryna aýyl sharýashylyǵy salasyndaǵy birqatar ınvestıtsııalyq jobalardy usyndy.

Buǵan qosa Qazaqstannyń Tuńǵysh Prezıdenti - Elbasy Nursultan Nazarbaevtyń bastamasymen qurylǵan Azyq-túlik qaýipsizdigi jónindegi ıslam uıymy (AQIU) men Astana halyqaralyq qarjy ortalyqtarynyń qyzmetimen tanystyrdy.

SALIC basshysy M.Djensen elimizdiń aýyl sharýashylyǵy, agro-ónerkásip salasyndaǵy ınvestıtsııalyq múmkindikter týraly aqparatty úlken qyzyǵýshylyqpen qabyl alyp, Qazaqstanmen ózara tıimdi yntymaqtastyq ornatýǵa múddelilik tanytty.

Kezdesý qorytyndysy boıynsha kompanııa delegatsııasynyń elimizge saparyn uıymdastyrý týraly ýaǵdalastyqqa qol jetkizildi.

SALIC Koroldiktiń azyq-túlik qaýipsizdigin qamtamasyz etý maqsatynda qurylǵan, quryltaıshysy SAK Memlekettik ınvestıtsııalyq qory bolyp tabylady. Kompanııa aýyl sharýashylyq ónimderin ósirýge jáne mal sharýashylyǵyn júrgizýge qolaıly shet elderge ınvestıtsııalar salýmen aınalysady. Alǵan ónimderin Saýd Arabııasyna ımporttaıdy. Búgingi tańda SALIC Kanada, Avstralııa, Ýkraına, Eýropa jáne basqa elderde iri ınvestıtsııalyq jobalardy júzege asyrýda.