Arab jazýy bar Qazaqstan týyn jarnamalaǵandarǵa quqyqtyq baǵa beriledi – Bas prokýratýra

ASTANA. KAZINFORM – Bas prokýror Berik Asylov Májilis depýtatynyń saýalyna joldaǵan jaýapta Atyraý qalasynda arab jazýy bar týmen sýretke túsken turǵyndar qandaı jazaǵa tartylǵanyn, tartylýy múmkin ekenin málim etti.

– Atyraý oblysyndaǵy oqıǵa boıynsha quqyqqa qaıshy əreket jasaǵan 4 qyzdy sot Ákimshilik quqyq buzýshylyq týraly kodekstiń 434-babynyń 1-bóligimen (usaq buzaqylyq) əkimshilik jaýapkershilikke tartty, - dep jazylǵan jaýapta. 

Sondaı-aq resmı málimette zań buzǵan tulǵalardyń aty-jóni men arqalaǵan aıyppul kólemi ashyq kórsetilgen. Ondaǵy málimetke súıensek, bir adamǵa 78 640 teńge, taǵy 3 adamǵa 39 320 teńge aıyppul salynǵan.

– Sonymen birge atalǵan fakti boıynsha 2025 jylǵy 27 naýryzda Atyraý qalasynyń Polıtsııa basqarmasy Qylmystyq kodekstiń 372-babymen (memlekettik rəmizderdi qorlaý) sotqa deıingi tergep-tekserýdi bastady. Qylmystyq is sheńberinde tıisti saraptama taǵaıyndaldy. Odan bólek saýalda kórsetilgen ýəjder tekseriledi. Olardyń nətıjeleri boıynsha quqyqtyq baǵa berilip, qylmystyq is boıynsha protsestik sheshim qabyldanady, - dep jazady Berik Asylov.

Bas prokýror standartqa saı emes Memlekettik Týlardy satqan marketpleıs sóreden ol ónimdi alyp tastaǵanyn da jetkizdi.

– Qylmystyq qýdalaý organymen «Ozon» marketpleısiniń Qazaqstandaǵy ókildigine qylmystyq quqyq buzýshylyqtar jəne basqa da zań buzýshylyqtar jasaýǵa yqpal etken mən-jaılardy joıý jónindegi usyný (Qylmystyq protsestik kodekstiń 200-babynyń tərtibinde) qylmystyq is sheńberinde joldandy. Nətıjesinde «Ozon» saıtynan jazýy bar Qazaqstan Respýblıkasynyń Memlekettik Týyn satý týraly, sondaı-aq kez kelgen dinı materıaldarǵa qatysty barlyq jarnama alynyp tastaldy, - delingen jaýapta.

Eske salsaq, naýryz aıynda Atyraý oblysynda arabsha jazýy bar da memlekettik týmen fotoǵa túskender ustalǵan bolatyn.