Arab úılestirý toby Qazaqstanda $7 mlrd-qa jobalar qarjylandyrýdy qarastyrýda
ASTANA. KAZINFORM – Astanada Islam damý banki, Saýd Arabııasynyń damý qory, OPEK halyqaralyq damý qory, Kýveıt ekonomıkalyq damý qory jáne Abý-Dabı damý qory syndy ınstıtýttardy biriktiretin Arab úılestirý tobynyń (AÚT) otyrysy ótti.
Іs-sharaǵa QR Premer-Mınıstriniń orynbasary – ulttyq ekonomıka mınıstri Nurlan Baıbazarov, Islam damý banki tobynyń prezıdenti Muhammed Sýleıman Ál-Djasser, Arab ınvestıtsııalyq qorlary men elimizdiń memlekettik organdary ári kvazımemlekettik kompanııalardyń basshylary qatysty.
Kezdesýdiń basty maqsaty Arab úılestirý tobynyń Qazaqstan úshin basymdyqqa ıe ınfraqurylymdyq jáne áleýmettik jobalardy qarjylandyrýy boldy.
Nurlan Baıbazarov óziniń alǵy sózinde elimizdiń ınvestıtsııalyq múmkindikterine qyzyǵýshylyq tanytqany úshin Arab úılestirý tobyna alǵys bildirdi.
«Búgin Qazaqstan Respýblıkasynda Arab úılestirý tobynyń birinshi dóńgelek ústel otyrysyn ótkizý arqyly berik ári uzaq merzimdi yntymaqtastyq baǵytynda birlesken alǵashqy qadam jasaımyz. Qoldaýlaryńyz ben yntymaqtastyqqa daıyn bolýlaryńyz biz úshin mańyzdy elimizdiń áleýetin moıyndaý bolyp tabylady», — dedi ol.
Dóńgelek ústel barysynda kólik, energetıka, sý resýrstary, densaýlyq saqtaý salalaryndaǵy jobalar tanystyryldy, sondaı-aq Qazaqstannyń 2030 jylǵa deıingi Ulttyq ınfraqurylymdyq jospary usynyldy.
Óz kezeginde Arab úılestirý toby delegatsııasynyń ókilderi elimizdiń áleýmettik-ekonomıkalyq jáne ınfraqurylymdyq damý jónindegi kúsh-jigerin joǵary baǵalady.
Kezdesý qorytyndysy boıynsha taraptar dóńgelek ústel otyrysynyń hattamasyna, OPEK qorymen jeke sektordaǵy operatsııalar týraly negizdemelik kelisimge jáne Sý resýrstary jáne ırrıgatsııa mınıstrligi men Islam damý banki arasyndaǵy kelissózder hattamasyna qol qoıdy. Qol qoıylǵan qujattar odan ári yntymaqtastyq salalar men áleýetti jobalardyń aldyn ala tizbesin aıqyndaıdy.
Qol jetkizilgen ýaǵdalastyqtar aıasynda Qazaqstan ekonomıkasyna uzaq merzimdi tikeleı ınvestıtsııalardyń somasy bastapqy kezeńde $7 mlrd quraýy múmkin. Bolashaqta qarjylandyrý kólemin ulǵaıtý josparlanýda.
Qorytyndylaı kele, Nurlan Baıbazarov Qazaqstan ekonomıkasynyń turaqty damýyna jáne elder arasyndaǵy ekonomıkalyq baılanysty nyǵaıtýǵa yqpal etetin aýqymdy jobalardy iske asyrýda áriptestik qatynas pen ózara tıimdi yntymaqtastyqty saqtap, odan ári nyǵaıtýǵa senim bildirdi.
