Arab túbegindegi ǵasyrlar boıy qalyptasqan dástúrli sharaǵa 764 myńnan astam adam qatysty

Saudi International Falcons and Hunting Exhibition 2026 kórmesine álemniń 47 elinen 1 446-dan astam kompanııa men brend, sondaı-aq 44 memlekettik mekeme qatysty. Aýmaǵy 200 myń sharshy metr bolatyn aýqymdy shara Er-Rııadtyń soltústigindegi Malham aýdanynda ornalasqan Er-Rııad kórme jáne kongress ortalyǵynda uıymdastyryldy.

Kórmeni Saýd Arabııasynyń Ulttyq suńqarlar ortalyǵy uıymdastyrdy. Shara aıasynda suńqarshylyq pen ańshylyqtan bólek, ashyq aspan astyndaǵy demalys túrleri, mádenı baǵdarlamalar, dástúrli qolóner jáne zamanaýı tehnologııalar tanystyryldy.

Suńqarshylyq Arab túbeginde ǵasyrlar boıy qalyptasqan dástúr sanalady. Búginde ol Saýd Arabııasynyń mádenı murasynyń mańyzdy bóligi retinde saqtalyp keledi. Kórme suńqarshylardy, ınvestorlardy, kásipkerler men otbasylardy bir alańǵa jınap, saýda-sattyq, jarystar jáne dástúrli ónerdi kórsetýge múmkindik berdi.

Ulttyq suńqarlar ortalyǵynyń bas atqarýshy dırektory Talal Ál-Shamaısıdiń aıtýynsha, kórmege kelýshiler sany men baǵdarlamalardyń aýqymy suńqarshylyq dástúrin saqtaý jáne onyń qyr-syryn jas urpaqqa jetkizýge degen qyzyǵýshylyqtyń joǵary ekenin kórsetti.

Kórme baǵdarlamasynda balalarǵa arnalǵan is-sharalar, suńqarshylyq tarıhyna arnalǵan mýzeı, taksıdermııalyq ekspozıtsııalar, dástúrli ańshylyq túrleri, balyq aýlaý, jaıaý saıahat, safarı, at jáne túıe miný, jol talǵamaıtyn kóliktermen saıahattaý jáne atý sporttary qamtyldy. Sonymen qatar tarıh, poezııa, dástúrli qolóner, tabıǵat aıasyndaǵy saıahat, kólik daıyndaý jáne qaýipsizdik taqyryptarynda sheberlik sabaqtary men pikirtalastar uıymdastyryldy.

Kórmeniń negizgi sharalarynyń biri – alty kúnge sozylǵan Al-Melwah suńqarlar jarysy boldy. 12 kezeńnen turǵan jarysta jalpy júlde qory 723 myń saýd rıalyn (shamamen 193 myń dollar) qurady. Ár kezeńniń úzdik bes qatysýshysyna júlde berildi.

Jarys barysynda jas suńqarlar 200 metr qashyqtyqta baq synady. Olar alty sanat boıynsha óner kórsetip, ózderiniń jyldamdyǵymen qatar, bapkerleriniń daıyndyǵyn da kórsetti.

Bıyl kórme aıasynda ekinshi ret Mońǵolııa suńqarlarynyń aýktsıony uıymdastyryldy. Aýktsıonda jas suńqar 1,4 mln saýd rıalyna (shamamen 373 myń dollar) satylyp, osy aýktsıon tarıhyndaǵy eń joǵary baǵa boıynsha rekord ornatty. Aýktsıondaǵy jalpy saýda kólemi 7 mln saýd rıalynan (1,87 mln dollar) asty.

Kórmeniń ańshylyq qarýlary, oq-dáriler men kerek-jaraqtar aımaǵynda 181-den astam halyqaralyq brendtiń 5 myńnan astam ónimi usynyldy. Olardyń qatarynda ańshylyq jáne sporttyq atys qarýlary, pnevmatıkalyq qarýlar, oq-dáriler, qaýipsizdik quraldary jáne qarýdy kútip ustaýǵa arnalǵan jabdyqtar boldy.

Uıymdastyrýshylar shara barysynda ıÝNESKO-nyń Búkilálemdik muralar tizimine engen Dırııadaǵy At-Týraıf tarıhı aýdanyn da tanystyrdy. Buǵan deıin kórme aıasynda 2024 jyly Ál-Ahsa oazısi, al 2025 jyly Nájrandaǵy Hıma mádenı aımaǵy tanystyrylǵan bolatyn.

Ulttyq suńqarlar ortalyǵy kelesi jylǵy kórmege daıyndyqty jeksenbi kúni bastaıtynyn málimdedi.

Sonymen qatar jergilikti jerde aýlanǵan suńqarlardyń aýktsıony 30 qarashaǵa deıin jalǵasady. Onyń qorytyndysy boıynsha 17-30 qarasha aralyǵynda ótetin Korol Abdýlazız atyndaǵy suńqarshylyq festıvaline daıyndyq júrgiziledi.

Festıvalge Saýd Arabııasynan jáne shetelden kelgen suńqarshylar qatysady. Baǵdarlamada Al-Melwah jyldamdyq jarysy jáne Mazayen baıqaýy ótedi. Sońǵysynda suńqarlardyń syrtqy kelbeti men erekshelikteri baǵalanady.