Arab sheıhtarynyń ańshylyǵynan túsken qarajat ekologııaǵa jumsalady – Dáýren Abaev

NUR-SULTAN. QazAqparat – QR Aqparat jáne damý mınıstri Dáýren Abaev arab sheıhtaryna ań-qus aýlaýǵa ruqsat berý bastamasy týraly pikir bildirdi, dep habarlaıdy QazAqparat.

«Munda brakonerlikke tyıym salyp, arab sheıhtaryna ruqsat berý týraly qosarly standart joq. Eń aldymen, máseleni zań júzinde reglamentteý qajettigi týyp otyr. ıAǵnı, ańshylyq jasaıtyn oryndy anyqtaý, ańshylyq merzimin bekitý jáne aýlaýǵa ruqsat etilgen ań-qus sanyn kórsetý kerek. Qazir de ózimizdiń balyqshylar men ańshylarǵa osy tártippen joldama beriledi. Ekinshiden, árbir aýlanǵan qus ańshy úshin aıtarlyqtaı qymbatqa shyǵady. Ol qarajat ekologııa men qoryqtyq aımaqtardy qorǵaýǵa jumsalady», - dedi mınıstr «Habar» arnasyndaǵy «Ashyq dıalog» baǵdarlamasynda.

Ekologııa, geologııa jáne tabıǵı resýrstar mınıstri Maǵzum Myrzaǵalıev keltirgen derekke sáıkes, Qazaqstanda 969 dýadaq atylǵan jáne kerisinshe 21 myńnan astam dýadaq erkindikke jiberilgen.

«Taǵy bir mysal, 70-jyldardyń basynda Kenııa bıligi sheteldikterdiń ań aýlaýyna tyıym saldy. Bul janýarlar álemin saqtap qalatyn durys sheshim tárizdi kórinedi. Alaıda, sodan beri Kenııa qarajattyń bolmaýynan, tabıǵı parkterin qorǵaı almady, jabaıy ańdardyń 2/3 bóliginen aıyryldy. Ońtústik Afrıka Respýblıkasynda jaǵdaı basqasha, olar trofeılik ańshylyqqa barynsha jaǵdaı jasady. Qazir olardyń jabaıy ańdary jarty mıllıonnan 20 mıllıonǵa jetti», - dep óz sózin túıindedi mınıstr.