Arab sammıti Mysyrdyń Gaza sektory boıynsha josparyn qoldady
ASTANA. KAZINFORM — Kaırde ótken sammıtte Gaza sektoryn qalpyna keltirýdiń quny 53 mlrd dollar bolatyn bes jyldyq jospary qoldaý tapty, dep málimdedi Mysyr prezıdenti as-Sısı, dep habarlaıdy DW.
Arab memleketteri Lıgasynyń tótenshe sammıtine qatysýshylar Izraılmen soǵysta qıraǵan, 53 mlrd dollar (shamamen 50,5 mlrd eýro) shyǵyndy talap etetin jáne palestınalyqtardy qonystandyrýdy qamtymaıtyn Gaza sektoryn qalpyna keltirý jónindegi Mysyr josparyn qoldady.
Kaırdegi sammıt qorytyndysy boıynsha qabyldanǵan sheshim týraly seısenbi, 4 naýryzda Mysyr prezıdenti Ábdel Fattah as-Sısı málimdedi. Reuters agenttigi atap ótkendeı, bul bes jyldyq jospar AQSh prezıdenti Donald Tramptyń Gaza turǵyndarynyń «dostyq» arab elderine jappaı kóshýin talap etetin «Taıaý Shyǵys rıverasy» týraly buryn jarııalaǵan kózqarasyna múlde qaıshy keledi.
Mysyr prezıdenti sózinde Amerıka prezıdentiniń usynysy arab elderiniń ókilderi tarapynan qatań synǵa ushyraǵanyna qaramastan, Tramptyń da aımaqtaǵy beıbit retteýge úles qosa alatynyna senim bildirdi.
— Palestına memleketin qurmaıynsha shynaıy beıbitshilik bolmaıdy. Beıbitshilikke kúshpen qol jetkizilmeıdi jáne ony kúshtep mindetteýge bolmaıdy, — dedi as-Sısı sammıttiń ashylýynda.
Mysyrdyń qaıta qurý jospary týraly ne belgili
BUU málimetinshe, soǵys saldarynan Gaza sektory 50 mln tonnadan astam qırandy astynda, ǵımarattardyń 70 paıyzdan astamy zaqymdalǵan nemese qıraǵan.
Dpa men Reuters tanysyp ótken 112 bettik qujat jobasyna sáıkes, qalpyna keltirýdiń bastapqy alty aılyq kezeńi úıindilerdi ashýǵa jáne ýaqytsha turǵyn úı ornatýǵa baǵyttalǵan jáne oǵan shamamen 3 mlrd dollar jumsalady.
Jospardyń birinshi kezeńinde Gaza sektorynda aldaǵy eki jylda 200 myń turǵyn úı salý qarastylyrǵan, ekinshi kezeńde de dál osynsha úı salynady. Qujat halyqaralyq qaýymdastyq pen donorlardy jedel kómek kórsetýge shaqyrady. Bul rette Birikken Arab Ámirlikteri men Saýd Arabııasy mańyzdy ról atqarýy múmkin degen boljam bar.
2030 jylǵa qaraı josparda 3 mln-ǵa deıin adam turatyn júzdegen myń jańa úı, sondaı-aq áýejaı, ındýstrııalyq aımaqtar, qonaq úıler men saıabaqtar salý qarastyrylǵan. Mysyr prezıdenti óz eliniń palestınalyqtarmen birge palestınalyq sarapshylardan turatyn ákimshilik komıtet qurǵanyn málimdedi. Bul komıtet gýmanıtarlyq kómekti qadaǵalap, Gaza sektoryn «Palestına bıligi qaıtyp kelgenge deıin ótpeli kezeńde» basqarýy tıis.
HAMAS qozǵalysynyń ókilderi Mysyrdyń Gazany qalpyna keltirý josparyn quptasa, Izraıl Syrtqy ister mınıstrligi sammıttegi deklaratsııany qatań synǵa aldy.
— Myńdaǵan ızraıldikterdiń ómirin qıyp, júzdegen adamdy urlap áketken HAMAS-tyń qatygez lańkestik áreketi týraly aıtylmaı otyr jáne bul qandy lańkestik uıymdy esh aıyptaý joq, — delingen onyń málimdemesinde.
Eske sala ketsek, arab elderiniń syrtqy ister mınıstrleri dúısenbi kúni Kaırde Palestına halqyn eshqaıda kóshirmeı-aq Gazany qalpyna keltirýdiń «arabsha josparyn» pysyqtaý úshin daıyndyq otyrysyn ótkizdi.