Arab-musylman derek kózderiniń Qazaqstannyń ortaǵasyrlyq tarıhy men mádenıetin zertteýdegi mańyzyna arnalǵan ınteraktıvti sabaq ótedi
ASTANA. Mamyrdyń 7-si. QazAqparat /Qanat Mámetqazyuly/ ‑Mamyrdyń 12-sinde qazaq jáne orys tilderinde «Jańadan tabylǵan arab-musylman derek kózderiniń Qazaqstannyń ortaǵasyrlyq tarıhy men mádenıetin zertteýdegi mańyzy» taqyrybynda «on-laın» rejiminde ınteraktıvti sabaq ótkiziledi.
Shara QR Bilim jáne ǵylym mınıstrliginiń uıymdastyrýymen «Mádenı mura» baǵdarlamasy aıasynda júrgizilgen ǵylymı zertteýlerdiń nátıjelerin orta mektepter men joǵary oqý oryndarynyń oqý baǵdarlamalaryna, oqýlyqtaryna engizý úshin, sondaı-aq olardy jalpy orta bilim berý uıymdarynyń oqýshylaryna keńinen tanystyrý jáne nasıhattaý maqsatynda júzege asatyn bolady, dep habarlaıdy QazAqparat.
Bilim jáne ǵylym mınıstrligi baspasóz qyzmetiniń habarlaýynsha, ınteraktıvti sabaqty R.B. Súleımenov atyndaǵy Shyǵystaný ınstıtýty dırektorynyń orynbasary, tarıh ǵylymdarynyń doktory Áshirbek Qurbanuly Mýmınov júrgizedi. «On-laın» rejimindegi sharanyń negizgi maqsaty - jańa tabylǵan arab-musylman derek kózderiniń negizinde Qazaqstan tarıhynyń az zerttelgen tustarymen tanystyrý, sondaı-aq Altyn Orda tarıhy boıynsha tabylǵan jańa derek kózderiniń mańyzyn ashý bolyp otyr. Budan bólek, jańa tabylǵan materıaldar negizinde Qazaq handyǵy qurylýynyń saıası, tarıhı jáne mádenı alǵysharttaryn qarastyrý kózdeledi.
Sonymen birge, orta bilim berý uıymdaryna arnalǵan «Meniń elimniń tarıhy» taqyrybyndaǵy ınteraktıvti sabaqtardy ótkizý budan ári jalǵasatyn bolady.
