Arab memleketteri lıgasynyń bas hatshysy Mysyr prezıdenttigi úshin saılaýǵa túsýi múmkin - RBK

Bul týraly Ámir Mussa frantsýzdyń Europe1 radıostansasyna bergen suhbatynda málim etti, dep habarlaıdy RBK agenttigi.

Prezıdenttik saılaýǵa túsý yqtımaldyǵy týraly saýalǵa bergen jaýabynda Á.Mussa: «Nege túspeske?», dep jaýap berdi. Lıga basshysynyń aıtýynsha, Hosnı Múbarak el prezıdenttiginde áli 7 aı boıy otyrady - onyń prezıdenttik merzimi 2011 jyldyń qyrkúıek aıynda aıaqtalady. Degenmen, Á.Mussa, «eldegi jáne Mysyrdaǵy qalyptasqan qazirgi shekten tys jaǵdaıǵa baılanysty Hosnı Múbaraktyń prezıdenttikten erterek ketý yqtımaldyǵyn» da joqqa shyǵarmady.

Prezıdenttik saılaýǵa óz kandıdatýrasyn usynýǵa ázir ekendigine qaramastan, Á.Mussa, saılaýdyń jaqyn arada ótýi ekitalaı ekenin atap kórsetti. Ol sondaı-aq Mysyrdyń «ótpeli» úkimetinde laýazymdardyń birine ıe bolý múmkindigin de málim etti. Qalaı bolǵanda da, Mysyrda jasaqtalatyn jańa úkimet oppozıtsııalyq «Musylman baýyrlar» qozǵalysynsyz jasaqtalmaıtyny anyq, dep paıymdady Á.Mussa.

Esterińizge sala keteıik, Mysyrda úkimetke qarsy narazylyq sharalary ótýde. Demonstranttar 1981 jyldan beri bılik basynda otyrǵan Hosnı Múbaraktyń otstavkasyn talap etýde. Degenmen, H.Múbarak 2011 jyldyń qyrkúıek aıyna belgilengen prezıdenttik saılaýǵa qatyspaýǵa keliskenimen, prezıdenttikten dereý ketýden bas tartty. Ol sondaı-aq, mınıstrler kabınetin jańartýǵa májbúr boldy.