Arab memleketteri HAMAS-tan qarýsyzdanýdy jáne bılikten bas tartýdy talap etti
ASTANA. KAZINFORM — Arab memleketteri alǵash ret Gaza sektoryn baqylaýdy Palestına ákimshiligine berý týraly ustanymdy jarııa túrde maquldady.
Qatar, Saýd Arabııasy, Mysyr, Iordanııa jáne Túrkııa HAMAS-ty qarýsyzdandyrýǵa jáne Gaza sektoryndaǵy bılikten bas tartýǵa shaqyratyn deklaratsııaǵa qol qoıdy.
Nıý-Iork deklaratsııasy dep atalatyn qujat BUU-nyń shtab-páterinde Izraıl men Palestına qaqtyǵysy máselesine arnalǵan konferentsııanyń qorytyndysy boıynsha qabyldandy.
Málimdemeni 17 el, sondaı-aq Eýropa odaǵy men pen Arab memleketteri lıgasy qoldady.
— Gazadaǵy soǵysty aıaqtaý turǵysynda HAMAS bılikten bas tartyp, halyqaralyq qoldaýmen Palestına ákimshiligine qarýdy tapsyrýy kerek, — delingen deklaratsııa mátininde.
Turkiye, Qatar, & other Arab countries call on Hamas to disarm as part of 'two state solution' declaration
— The Cradle (@TheCradleMedia) July 30, 2025
——
Arab and Muslim countries, including Saudi Arabia, Qatar, Egypt, Jordan, and Turkiye, along with 17 other nations, the Arab League, and the European Union, signed the… pic.twitter.com/Ce9Tv4riSq
Bul málimdeme — Arab memleketteri lıgasy músheleriniń HAMAS-ty alǵash ret birlesip aıyptaýy.
Soǵysty toqtatýǵa arnalǵan úndeý
Deklaratsııada Izraıldiń Gazadaǵy beıbit turǵyndar men ınfraqurylymǵa jasaǵan soqqysy, gýmanıtarlyq kómekke shekteý qoıýy, Batys jaǵalaýda eldi meken salýy jáne qonystanǵandar tarapynan bolǵan zorlyq-zombylyq aıyptalǵan. Qujatta Izraıldi palestınalyqtardyń táýelsiz memleket qurý quqyǵyn tanýǵa jáne arab aýmaǵyn, sonyń ishinde Shyǵys Ierýsalımdi basyp alýyn toqtatýǵa shaqyrady.
— Soǵysty toqtatý, kepilge alynǵandardy bosatý jáne táýelsiz ári demokratııalyq Palestına memleketin qurýdy júzege asyrý arqyly ǵana osy óńirdegi qarym-qatynasty qalypqa keltirýge qol jetkize alamyz, — dep atalyp ótken qujatta.
Halyqaralyq mıssııa jáne ekonomıka
Konferentsııaǵa qatysqan elderdiń ókilderi BUU Qaýipsizdik Keńesiniń mandaty boıynsha Gaza sektorynda ýaqytsha halyqaralyq turaqtandyrý mıssııasyn qurý, sondaı-aq Palestına ekonomıkasy men bilim berý júıesin qalpyna keltirý ıdeıasyn qoldady.
Palestına jáne Izraıl oqýlyqtaryndaǵy óshpendilikke alyp keletin materıaldardy joıý qajettiligi erekshe atap ótken.
Saıası belgi men perspektıvalar
Konferentsııanyń teń tóraǵalary Frantsııa men Saýd Arabııasy bul deklaratsııany tarıhı mańyzy bar qujat dep atady.
Konferentsııaǵa qatysqan Frantsııa men basqa da 14 eldiń syrtqy ister mınıstrleri álem elderin Palestına memleketin moıyndaýǵa shaqyratyn «Nıý-Iork úndeýi» atty bastama kóterdi. Bul týraly Frantsııa syrtqy ister mınıstri Jan-Noel Barro málim etti.
— Biz Palestına memlekettiligin óńirdegi turaqty beıbitshilik jolyndaǵy qajet qadam retinde tanýdy ilgeriletý úshin kúsh-jigerimizdi biriktiremiz, — dedi Barro.
Málimdemege Andorra, Aýstralııa, Kanada, Fınlıandııa, Frantsııa, Islandııa, Irlandııa, Lıýksembýrg, Malta, Jańa Zelandııa, Norvegııa, Portýgalııa, San-Marıno, Slovenııa jáne Ispanııanyń syrtqy ister mınıstrleri qol qoıdy.
A New York avec 14 autres pays, la France lance un appel collectif : nous exprimons notre volonté de reconnaître l'Etat de Palestine et invitons ceux qui ne l’ont pas encore fait à nous rejoindre. pic.twitter.com/faCYTYwmES
— Jean-Noël Barrot (@jnbarrot) July 30, 2025
Sondaı-aq ol arab elderiniń birtutas ustanymyna toqtaldy:
— Arab elderi alǵash ret HAMAS-ty qarýsyzdandyrýǵa, ony Gaza sektoryn basqarýdan shyǵarýǵa shaqyrdy jáne Izraılmen qarym-qatynasty qalypqa keltirýge daıyn ekendikterin málimdedi, — dedi mınıstr.
Degenmen, Izraıldiń ózi jáne onyń negizgi odaqtasy AQSh konferentsııaǵa qatyspady. Izraıldiń sheneýnikteri deklaratsııanyń mazmunyn synap, qazirgi jaǵdaıda Palestına memleketin qurý múmkindigin joqqa shyǵardy.
Al Ulybrıtanııa men Frantsııa qyrkúıekte Palestına memleketin moıyndaý nıetterin jarııalady.
Ótken aptada Frantsııa prezıdenti Emmanýel Makron qyrkúıekte BUU Bas Assambleıasynda Palestınany moıyndaıtynyn jarııalady.
Jaqynda bul bastamaǵa Ulybrıtanııa úkimetiniń basshysy da qosyldy. Ulybrıtanııa premer-mınıstri Kır Starmer eger Izraıl aldaǵy segiz apta ishinde atysty toqtatýǵa jáne uzaq merzimdi bitimgershilik protsesine kelispese, Ulybrıtanııa qyrkúıektegi kezdesýge deıin Palestına memleketin moıyndaıtynyn aıtty.
Budan buryn habarlanǵandaı, Gazanyń qorshaýdaǵy sektoryndaǵy búkil halyq ótkir azyq-túlik tapshylyǵyn bastan keshirip otyr. Bul týraly BUU jarııalaǵan «2025 jylǵy jahandyq azyq-túlik qaýipsizdigi men tamaqtaný» atty baıandamada aıtylǵan.
Jaqynda Kır Starmer Gazadaǵy jaǵdaıǵa baılanysty mınıstrler kabınetiniń shuǵyl otyrysyn shaqyratynyn jazǵan edik.
Osyǵan deıin Gaza sektorynda ashtyqtan qaıtys bolǵandar sany 127 adamǵa jetkeni málim boldy.