Arab memleketteri lıgasy Izraıldiń Gaza sektoryn qorshaýǵa alǵanyn aıyptady
Sársenbi kúni arab elderiniń syrtqy ister mınıstrleri palestınalyq HAMAS sodyrlarynyń Izraılge kútpegen shabýylynan keıin Izraıldiń Gaza sektoryn qorshaýyn aıyptady, sondaı-aq qorshaýda qalǵan halyqqa gýmanıtarlyq kómekti tez arada jiberýdi talap etti, dep habarlaıdy Kazinform agenttigi Gulf Times basylymyna silteme jasap.
Arab elderi lıgasynyń Kaırdegi shtab-páterinde ótken kezdesýde arab elderiniń syrtqy ister mınıstrleri jalǵasyp jatqan soǵysty talqylap, Izraılden Gaza sektoryndaǵy qorshaýdy joıýdy talap etti.
Syrtqy ister mınıstrleriniń kezekten tys otyrysynda Arab Lıgasy Izraıldiń Gaza sektoryndaǵy áskerı joryǵyn jáne aımaqtaǵy shıelenistiń ýshyǵýyn dereý toqtatý qajettigin basa aıtty.
Sondaı-aq, Gaza sektoryna azyq-túlik, janarmaı jáne gýmanıtarlyq kómekti «tez arada» jóneltýge shaqyrdy.
Arab elderiniń syrtqy ister mınıstrleri sonymen qatar Izraıldi «Gaza sektoryna elektr qýaty men sý berýdi toqtatý týraly ádiletsiz sheshimin» qaıta qaraýǵa shaqyrdy.
Marokko tóraǵalyq etetin Arab elderi lıgasynyń mınıstrleri «Izraıldiń Palestına halqyna agressııasy» dep atalatyn qararynda halyqaralyq quqyqty saqtaı otyryp, jaǵdaıdy tez arada sheshý úshin belsendi halyqaralyq yntymaqtastyqqa shaqyrdy.
Arab elderiniń syrtqy ister mınıstrleri aımaqtyq qaýipsizdik pen turaqtylyqqa aparatyn jol Palestına halqynyń zańdy quqyqtaryn qorǵaıtyn ádil jáne jan-jaqty beıbitshilikke qol jetkizý arqyly ótetinin basa aıtty.
Bul olardyń 1967 jylǵy maýsymǵa deıingi shekarasynda astanasy Shyǵys Ierýsalım bolatyn táýelsiz jáne egemendi memleket qurý quqyǵyn qamtıdy.
Mınıstrler arab lıgasynyń mıssııalaryna, arab elshileri keńesterine jáne BUU janyndaǵy arab tobyna qarardyń mazmunyn jetkizý úshin halyqaralyq deńgeıde áreket etýdi jáne Izraıldiń Palestına halqyna qarsy agressııasyn toqtatý úshin halyqaralyq seriktestermen jumys isteýdi tapsyrdy.
BUU palestınalyq bosqyndar jónindegi agenttigi (BAPOR) Gazaǵa mańyzdy kómek kórsetý úshin 104 mln dollar izdep jatqanyn habarlady.
Sársenbi kúni Izraıl tótenshe birlik úkimetin qurdy.
Premer-mınıstr Bınıamın Netanıahý burynǵy qorǵanys mınıstri jáne tsentrıstik oppozıtsııalyq partııa jetekshisi Bennı Gantspen soǵys kabınetin qurý jáne janjalǵa tolyǵymen nazar aýdarý jóninde kelisti.
AQSh Memlekettik hatshysy Entonı Blınken keń aýqymdy qaqtyǵysty toqtatý úshin keshe Taıaý Shyǵystaǵy mıssııamen Izraılge bardy.
Senbi kúni Palestına Syrtqy ister mınıstrligi Izraılmen jaǵdaıdyń órshýine baılanysty Arab lıgasynyń mınıstrler deńgeıindegi shuǵyl kezdesýin ótkizýdi talap etti.