Arab-ıslam sammıtine qatysqan Ózbekstan delegatsııasy Qatarǵa qoldaý bildirdi

TAShKENT. KAZINFORM – Ózbekstannyń Syrtqy ister mınıstri Bahtıer Saıdov bastaǵan úkimettik delegatsııa Qatar astanasynda ótken arab-ıslam tótenshe sammıtine qatysty, dep habarlaıdy Kazinform menshikti tilshisi.

Sammıtte Bahtıer Saıdov Ózbekstan prezıdenti Shavkat Mırzıeevtiń jaǵdaıǵa qatysty málimdemesin oqyp berdi.

- Málimdemede prezıdent Ózbekstannyń baýyrlas Qatar halqymen jáne barlyq musylman elderimen aradaǵy yntymaqtastyqqa ereshe nazar aýdaratynyn atap ótti. Sondaı-aq, Shavkat Mırzıeev Taıaý Shyǵystaǵy beıbitshilik pen qaýipsizdikke qater tóndiretin sońǵy áskerı agressııany qatań aıyptady, - dep jazdy Ózbekstannyń Syrtqy ister mınıstri óziniń Telegram-arnasynda.

Vedomstvo basshysy Ózbekstan óziniń myzǵymas ustanymyn ózgertpeıtinin basa aıtty. Onyń sózinshe, barlyq qaqtyǵys beıbit jolmen sheshilýi kerek. Sonymen birge, halyqaralyq qaýymdastyq zorlyq-zombylyqty toqtatý jáne onyń órshýine jol bermeý úshin shuǵyl shara qabyldaýy tıis.

- BUU qararlaryna sáıkes, Palestına halqynyń táýelsiz memleket qurýǵa zańdy quqyǵyn qurmetteý kerek. Ózbekstan zardap shekkenderge gýmanıtarlyq kómek kórsetýge daıyn. Biz qazirdiń ózinde Palestına azamattaryn qabyldap, olarǵa qajetti qoldaý sharalaryn usyndyq, - dep málim etti mınıstr.

Bahtıer Saıdov arab-ıslam tótenshe sammıtin joǵary baǵalap, ony aımaqtaǵy beıbitshilik pen turaqtylyqty qamtamasyz etýge baǵyttalǵan tıimdi sheshimder qabyldanatyn alań ekenin atap ótti.

Eske salaıyq, buǵan deıin Dohadaǵy arab-ıslam sammıtine qatysýshylar Izraıldiń BUU-daǵy músheligin toqtatýǵa shaqyrdy.

Buǵan deıin Qasym-Jomart Toqaev Dohada Izraıl bıligi jasaǵan áskerı aktsııany aıyptaǵanyn jazǵan edik.

Sonymen qatar, BUU Qaýipsizdik keńesi de Dohaǵa jasalǵan soqqyny aıyptady.