Arab elderiniń áýe kompanııalary Saýd Arabııasyna reısterdi toqtatty
ASTANA. KAZINFORM — Saýd Arabııasynyń Er-Rııad qalasyndaǵy Korol Halıd atyndaǵy halyqaralyq áýejaıǵa jasalǵan shabýyldardan keıin birneshe arab eliniń áýe kompanııalary bul memleketke qatynaıtyn reısterin ýaqytsha toqtatty. Áýejaı da ushaqtarǵa qyzmet kórsetýdi ýaqytsha keıinge qaldyrdy, dep habarlaıdy Anadoly.
Bahreınniń Gulf Air áýe kompanııasy 12-17 qazan aralyǵynda Bahreın men Er-Rııad arasyndaǵy eki baǵyttaǵy barlyq reısti toqtatty.
Qatar Airways sońǵy oqıǵalarǵa baılanysty Er-Rııad pen Dammam qalalaryna qatynaıtyn reıster ýaqytsha toqtatylǵanyn habarlady.
Birikken Arab Ámirlikteriniń ulttyq áýe tasymaldaýshysy Etihad Airways Abý-Dabı men Er-Rııad arasyndaǵy barlyq reısti 19 qazan, dúısenbige deıin toqtatty. Budan bólek, kompanııa seısenbi jáne sársenbi kúnderine josparlanǵan Abý-Dabı — Dammam reısterin, sondaı-aq beısenbige deıin Abý-Dabıden Jıddaǵa qatynaıtyn keıbir reısterdi toqtatty.
Kýveıttiń Kuwait Airways áýe kompanııasy Korol Halıd atyndaǵy halyqaralyq áýejaıdyń ýaqytsha jabylýyna baılanysty Er-Rııadqa qatynaıtyn reısterdiń toqtatylǵanyn málimdedi.
Mysyrdyń EgyptAir áýe kompanııasy áýejaı jumysy qaıta jandanǵanǵa deıin Kaır men Aleksandrııadan Er-Rııadqa ushatyn reıster toqtatylǵanyn habarlady.
Saýd Arabııasynyń Azamattyq avıatsııa bas basqarmasy Korol Halıd atyndaǵy halyqaralyq áýejaıdyń jumysy qosymsha habarlamaǵa deıin toqtatylatynyn málimdedi. Vedomstvonyń túsindirýinshe, mundaı sheshim áýejaı ınfraqurylymynyń qaýipsizdigin tekserý jáne onyń jumysyn qaıta bastaýǵa daıyndyǵyn baǵalaý úshin qabyldanǵan. Tekserý jumystary tıisti memlekettik organdarmen birlesip júrgizilip jatyr.
Áýe qatynasyndaǵy úzilisterge baılanysty Saýd Arabııasynyń Katar, Bahreın, Oman, Birikken Arab Ámirlikteri jáne Kýveıttegi elshilikteri reısterdiń toqtatylýyna baılanysty eline qaıta almaı júrgen azamattaryn Er-Rııadqa jetkizý úshin avtobýs qatynasyn uıymdastyrdy.
Eske salaıyq, sońǵy bir aptada Saýd Arabııasyndaǵy 5 áýejaıǵa on ret shabýyl jasalǵan. Saldarynan 20 adam qaza taýyp, júzdegen adam jaralandy.
Aıta keteıik, hýsıtter Saýd Arabııasynyń áýejaılaryna taǵy da shabýyldar jasaıtynyn eskertti.
Buǵan deıin Syrtqy ister mınıstrligi Saýd Arabııasynyń azamattyq ınfraqurylymyna jasalǵan shabýyldarǵa baılanysty atalǵan eldegi Qazaqstan azamattaryn qaýipsizdik sharalaryn saqtaýǵa shaqyrǵan bolatyn.
