Arab elderiniń ǵalymdary Ata Zańymyzǵa qarap elimizdiń turaqtylyǵynyń negizin túsinýde -Qaırat Lama Shárip
«Jalpy 20 jyl dıplomatııalyq qyzmette júrgende árbir elge barǵan saıyn sol memleketterdiń konstıtýtsııalaryn oqı otyryp, ózimizdiń Ata Zańymyzben salystyratyn ádetim bar. Sonda baıqaǵanym, bizdiń Konstıtýtsııa barlyq adamnyń qoǵamda ómir súrýine qolaıly barlyq jaǵdaıdy qamtamasyz etken. Ata Zańymyzdy arab tiline aýdaryp, túrli ǵalymdar men zertteýshilerge tapsyrǵan kezde, olar bizdiń kóp etnosty memlekette eshbir qaıshylyqsyz ómir súrip jatqandyǵymyzdyń túp tamyryn túsinýde. Negizgi zańymyzda «dinine de, ultyna da qaramaı búkil Qazaqstan azamaty birdeı» degen uǵym óte jaqsy sıpatqa ıe»,-dedi Elshi.
Onyń sózine qaraǵanda, osy aptada Astanadaǵy Táýelsizdik saraıynda ótken Qazaqstan Respýblıkasy Ata Zańynyń 20 jyldyǵyna arnalǵan «Konstıtýtsııa: birlik, turaqtylyq, órkendeý» taqyrybynda halyqaralyq ǵylymı-tájirıbelik konferentsııaǵa Birikke Arab Ámirlikterinen bir top delegatsııa keldi.
«Ata Zańymyzdyń 20 jyldyq merekesi jáne bıylǵy jylǵy Qazaqstan handyǵynyń 550 jyldyǵy, sondaı-aq Qazaqstan halqy Assambleıasynyń 20 jyldyǵy tárizdi aıtýly merekeler tek Qazaqstanda ǵana emes, sonymen qatar shet elderde de elshilikter arqyly atalyp ótýde. Osy merekelerdiń barlyǵy qutty bolsyn!»,-dedi Qaırat Lama Shárip.