Arab elderine qoı etiniń eksport kólemi ulǵaıady - AShM

ASTANA. QazAqparat - QR Aýyl sharýashylyǵy vıtse-mınıstri Aıdarbek Saparov pen «Al-Reef Al-Tholathy» atqarýshy dırektory Muhammed Nasser Almýkeırısh Qazaqstan men Saýd Arabııasyndaǵy azyq-túlik ónimderin óndiretin iri kompanııalardyń birimen yntymaqtastyqtyń keleshegin talqylady, dep habarlaıdy QazAqparat.

Atap aıtqanda, Arab kásipkerleriniń Qazaqstanda qurylatyn «Qoı sharýashylyǵyn damytý qory» jumysyna qatysý múmkindigi qarastyrylǵan.

«Joba qazaqstandyq qoı men qozyny arab memleketterine, birinshi kezekte Parsy shyǵanaǵy elderine jetkizýge yqpal etetin bolady. Óndirilgen qarajatty odan ári qoı ósirýmen aınalysatyn otandyq fermerlerdi qarjylandyrý úshin paıdalaný josparlanyp otyr. Qazirgi ýaqytta jobaǵa ınvestorlardy tartý boıynsha jumys bastaldy. Saýd Arabııasynyń qarqyndy damyp kele jatqan kompanııalarynyń biri sanalatyn jáne óz naryǵyn joǵary sapaly salqyndatylǵan etpen qamtamasyz etýmen aınalysatyn «Al-Reef Al-Tholathy» kompanııasy áleýetti seriktes bola alady», - dep jazdy vedomstvodan.

Aıta keteıik, 2022 jyldyń 9 aıynyń qorytyndysy boıynsha qazaqstandyq mal ósirýshiler 29,7 myń tonna et, onyń ishinde 6,7 myń tonna qoı etin eksporttady. Otandyq qoıdyń negizgi tutynýshylary - Ózbekstan, BAÁ, Kýveıt, Oman jáne Bahreın memleketteri. Aýyl sharýashylyǵy mınıstrligi qazaqstandyq qoı etin óndirýshiler úshin ótkizý naryǵyn keńeıtýge jáne óndiristi ulǵaıtýǵa odan ári yqpal etetin bolady.

Arab delegatsııasy Qazaqstanǵa sapary aıasynda jergilikti mal sharýashylyǵy kásiporyndarynyń jumysymen tanysý úshin elimizdiń ońtústik óńirlerine bardy.