Arab elderi Ierýsalımdegi palestınalyqtarǵa 500 mıllıon dollar kómek bóledi
ASTANA. Naýryzdyń 26-sy. QazAqparat - Arab elderiniń syrtqy ister mınıstrleri Ierýsalımde turatyn palestınalyqtarǵa 500 mıllıon dollar kómek bólý týraly sheshim qabyldady, dep habarlady jýrnalısterge Arab memleketteri lıgasynyń bas hatshysy Amr Musa.
Arab elderi syrtqy ister mınıstrleriniń májilisi Lıvııanyń Sırt qalasynda ótip jatyr. Palestınalyqtarǵa qarjylaı kómek «Ierýsalımdi qutqarý jónindegi is-sharalar jospary» dep atalatyn jospardyń aıasynda bólinedi. Bul qujatta sondaı-aq, Ierýsalımdegi demografııalyq jaǵdaıdy Izraıldiń paıdasyna jasandy jolmen ózgertýge jol bermeý maqsatynan halyqaralyq sottarǵa, BUU Qaýipsizdik Keńesine úndeýler qarastyrylǵan.
Buǵan deıin Izraıl palestınalyqtar ózderiniń bolashaq memleketteriniń elordasy dep sanaıtyn Shyǵys Ierýsalımde jańa qonystar salý týraly josparyn jarııa etken bolatyn.
Beısenbi kúni ótken Arab elderiniń syrtqy ister mınıstrleriniń kezdesýinde naýryzdyń 27-28-inde ótetin Arab sammıtiniń kúntártibi talqylandy.
