Arab elderi AQSh-ty Ierýsalım jónindegi sheshimin qaıtaryp alýǵa shaqyrdy

Arab elderiniń málimdeýinshe, bul jaǵdaı Taıaý Shyǵysta tártipsizdikterge ákep soqtyrýy múmkin, dep habarlaıdy VVS .

Arab memleketteri lıgasynyń syrtqy ister mınıstrleri AQSh-qa budan bylaı óńirde beıbitshilik ornatý jónindegi senimdi seriktes retinde qaraýǵa bolmaıtynyn málimdedi.

22 memlekettiń syrtqy ister mınıstrleri bul málimdemeni Iordan ózeniniń batys jaǵalaýy men Gaza sektorynda úsh kúnnen beri narazylyq aktsııalary tolastamaı turǵan tusta jarııalady.

AQSh talaı jyldan beri Palestına men Izraıl úshin óte názik máselede beıtarap saıasat ustanyp kelgen bolatyn, biraq Donald Tramptyń saılaý aldyndaǵy ýádesin oryndap, Ierýsalımdi Izraıl astanasy dep jarııalaýy bul ustanymnan kúrt sheginis boldy.

Arab elderi lıgasynyń qarary birneshe saǵattyq talqylaýdan soń qabyldandy. Oǵan tipti BAÁ, Saýd Arabııasy, Iordanııa sekildi AQSh-tyń odaqtastary da kelisim bergen.

Qararda AQSh munymen Izraıl-Palestına máselelerindegi kez kelgen beıbit protsesten «uıymdastyrýshy jáne bitimger retinde ózin-ózi shettetkeni» aıtylady.

Izraıl Ierýsalımdi óziniń astanasy dep sanaıdy, al Palestına Shyǵys Ierýsalımdi 1967 jylǵy soǵys kezinde Izraıl jaýlap aldy degendi alǵa tartady.

Ierýsalımde ıýdaızm, ıslam jáne hrıstıan dinderi úshin mańyzdy kıeli jerler bar. Izraıl 1967 jylǵy soǵysqa deıin Iordanııanyń enshisinde turǵan Shyǵys Ierýsalımdi aldymen okkýpatsııalap, 1989 jyly anneksııalady. Biraq buny halyqaralyq qoǵamdastyq moıyndaǵan joq.

Shyǵys Ierýsalımde 330 myń palestınalyq jáne 200 myńdaı evreı turady. Olardyń qonystanýy halyqaralyq zańnamaǵa sáıkes zańsyz delinedi, alaıda Izraıl tarapy ol eldi mekenderdi zańdy dep ataýmen keledi.

1993 jylǵy beıbit kelisimge sáıkes, Ierýsalımniń statýsy beıbit protsestiń sońǵy kezeńinde sheshilýi tıis edi.

2014 jyly beıbit protsesterdiń sońǵy kezeńi tyǵyryqqa tireldi. AQSh jańa usynystaryn bildirgenmen, Palestına ókilderi Donald Tramptyń jýyrdaǵy sheshimi AQSh-ty beıbit protsesterdiń bitimgeri retindegi rólinen aıyrdy dep otyr.

Juma kúni Tramptyń málimdemesine qatysty Qaýipsizdik Keńesiniń shuǵyl otyrysy shaqyrylǵan bolatyn. Onda Eýropanyń bes eli AQSh-ty BUU qararlaryn buzdy dep aıyptady.