Arab elderi batystyń Palestınany moıyndaýyn qýanyshpen qabyldady
ASTANA. KAZINFORM - Arab elderi men uıymdary Ulybrıtanııa, Kanada, Avstralııa jáne Portýgalııa sııaqty batys memleketteriniń Palestınany resmı túrde moıyndaýyn qýanyshpen qabyldady, dep habarlaıdy TRT aqparattyq agenttigi.
Saýd Arabııasy jeksenbi kúni jasaǵan málimdemesinde bul dos elder beıbitshilik jolyn qoldaýǵa jáne eki memleket negizindegi sheshimge qatysty zańdy BUU qaýlylary negizinde rastaǵanyn aıtty.
Kýveıt Syrtqy ister mınıstrligi taratqan málimdemesinde bul moıyndaý aımaqtaǵy beıbitshilik múmkindigin arttyryp, eki memleketke negizdelgen sheshimge baǵyttalǵan halyqaralyq kúsh-jigerdi qoldaýǵa úles qosatynyn atap ótti. Sondaı-aq mınıstrlik óńirdegi qaýipsizdik, turaqtylyq jáne órkendeýdiń jalǵasýy úshin basqa da elderdi osyndaı qadam basýǵa shaqyrdy.
Oman da bul sheshimdi eki memleket negizindegi sheshim men óńirlik qaýipsizdik pen beıbitshilikke qatysty asa mańyzdy oqıǵa dep baǵalap, málimdemelerdi quptady. Oman Syrtqy ister mınıstrligi Palestınany áli moıyndamaǵan memleketterdi 1967 jylǵy shekaralar negizinde astanasy Shyǵys Ierýsalım bolatyn táýelsiz memleketin qurý jónindegi Palestına halqynyń quqyǵyn qamtamasyz etý úshin Palestına memleketin moıyndaýǵa shaqyrdy.
Iordanııa Korol saraıynyń habarlaýynsha, Korol ІІ Abdýlla Nıý-Iorkte Avstralııa premer-mınıstri Entonı Albanezemen kezdesý barysynda Avstralııanyń Palestınany moıyndaý sheshimin joǵary baǵalady.
Parsy shyǵanaǵy yntymaqtastyq keńesi bul málimdemelerdi «ádilet pen halyqaralyq zańdylyqqa jetý jolyndaǵy mańyzdy tarıhı oqıǵa» dep atady.
Aıta keteıik, Ulybrıtanııa, Kanada, Avstralııa jáne Portýgalııa BUU Bas Assambleıasy qarsańynda Palestınany resmı túrde moıyndaǵan bolatyn. Qazirgi tańda BUU-ǵa múshe memleketterdiń shamamen tórtten úshi Palestınany moıyndaǵan. Ótken jyly Irlandııa, Ispanııa jáne Norvegııa bul sheshimdi resmı túrde qabyldady.
Eske sala keteıik, buǵan deıin Ejelgi Irannyń tańǵajaıyp dástúrli «muzdatqyshtary» týraly jazǵamyz.