Arab Ámirlikterine demalýǵa barǵan elordalyqtardyń neden ýlanǵany belgili boldy
ASTANA. QazAqparat - Birikken Arab Ámirlikterine demalýǵa barǵan elordalyqtardyń neden ýlanǵany belgili boldy. Ony búgin Úkimet otyrysynan keıin Qazaqstannyń bas memlekettik sanıtar dárigeri Jandarbek Bekshın aıtty, dep habarlaıdy QazAqparat tilshisi.
«Bul juqpa bolyp shyqty. Birqatary salmonellezben, endi bireýleri stafılokokkpen aýyrǵan. 8 qazaqstandyq medıtsınalyq kómekke júgingen, barlyǵy da astanalyqtar. Olar ınfektsııalyq aýrýhanaǵa júgingen. Barlyǵy da emdelip, qazir aýrýhanadan shyqty. Olar tutynýshylar quqyǵyn qorǵaý organdaryna atalǵan sapardy uıymdastyrǵan týrıstik operatordyń ústinen shaǵym túsirmek», - dedi ol.
Buǵan deıin BAQ-ta Shardja kýrortyndaǵy (BAÁ) jappaı ýlaný týraly habarlanǵan edi. Oqıǵa Sheraton qonaq úıinde bolǵan. Zardap shekkender qonaq úı men týrıstik operatordy sotqa berýdi kózdep otyr.
21 mamyrda Astana qalasynyń densaýlyq saqtaý basqarmasy Shardjada ýlanǵan balalardyń jaǵdaıy týraly málimet taratty.
