Arab Ámirlikterinde Aýǵanstanda qaza tapqan dıplomattardy aqtyq saparǵa shyǵaryp saldy
ÁBÝ-DABI. QazAqparat - Senbide Ábý-Dabı qalasyndaǵy Ál Batın áskerı áýe aılaǵyna Aýǵanstannan kelgen ushaq Qandaǵar provıntsııasynda terakti kezinde qaza tapqan tórt Ámirliktiń dıplomatynyń denesin jetkizdi, dep habarlaıdy «QazAqparat» tilshisi.
Sársenbide Qandaǵarda bolǵan jarylys saldarynan 12 adam qaza tapty, onyń ishinde Aýǵanstandaǵy BAÁ elshiliginiń 4 dıplomaty da bar. Terakti kezinde 18 adam zardap shekti.
Arab Ámirlikteriniń jurty Abdýlhamıd Sultan Ál Hammadı, Abdýlla Mohammed Ál Kaabı, Ahmed Abdýlrahman Ál Týnaıdjı men Ahmed Ál Mazrýımen qoshtasty. Sharıǵat zańyna baılanysty jerleý Ábý-Dabı, Ál-Aına, Shardja jáne Ras-Ál-Haımda sol kúni júrgizildi.
Senbide BAÁ Qarýly kúshteriniń bas qolbasshysynyń orynbasary, murager hanzada Ábý-Dabı sheıh Mohammed ben Zaıed Ál Nahaııan Qandaǵarda zardap shegip, qazir aýrýhanada jatqan besinshi dıplomat Múbarak Ál Saýdıdiń hal-jaǵdaıyn surap qaıtty.
- Eshqandaı qylmystyq teraktiler BAÁ halqynyń qaýipsizdik pen beıbitshilikti taratýdy jalǵastyrý jónindegi alǵan betinen qaıtara almaıdy, dedi sheıh Mohammed.
