Ara sharýashylyǵy: omartanyń veterınarııalyq pasportyn qaıdan alýǵa bolady
ASTANA. KAZINFORM — «QR keıbir zańnamalyq aktilerine asyl tuqymdy mal sharýashylyǵy jáne bal ara sharýashylyǵy máseleleri boıynsha ózgerister men tolyqtyrýlar engizý týraly» QR Zańyna Memleket basshysy qol qoıdy.
Qujatqa saı, omartanyń veterınarııalyq pasporty degen jańa uǵym engiziledi.
— Omartanyń veterınarııalyq pasporty — omartanyń ıesi, bal ara uıalarynyń sany, júrgizilgen veterınarııalyq óńdeýlerdiń merzimi men sıpaty kórsetiletin belgilengen nysandaǵy qujat, — dep túsindirilgen zańda.
Al veterınarııalyq pasportty omartashylarǵa ár óńirdegi ákimdikter qurǵan memlekettik veterınarııalyq uıymdar beredi.
— Omartalardy esepke alý jáne emdeý-aldyn alý is-sharalaryn júzege asyrý maqsatynda astananyń, oblystardyń, respýblıkalyq mańyzy bar qalalardyń jergilikti atqarýshy organdary qurǵan memlekettik veterınarııalyq uıymdar árbir omartaǵa veterınarııa salasyndaǵy ýákiletti organ aıqyndaǵan tártippen jáne nysanda omartanyń veterınarııalyq pasportyn beredi, — delingen qujatta.
Jergilikti atqarýshy organdarǵa basqa da mindettemeler júktelgen.
— Astananyń, oblystardyń, respýblıkalyq mańyzy bar qalalardyń
jergilikti atqarýshy organdary tıisti ákimshilik-aýmaqtyq birlikte bal aralardy qorǵaý, molyqtyrý jáne paıdalaný salasynda ǵylymı zertteýler júrgizýdi uıymdastyrýdy jáne (nemese) qamtamasyz etýdi jergilikti memlekettik basqarý múddesinde QR zańnamasymen jergilikti atqarýshy organdarǵa júkteletin ózge de ókilettikterdi júzege asyrady, — delingen zańda.
Sonymen qatar, onda omartalardyń ornalasý qashyqtyǵyna qatysty talaptar da qamtylǵan.
— Kóshpeli omartalar bir-birinen kem degende bir jarym kılometr jáne statsıonarlyq omartalardan úsh kılometr qashyqtyqta bal jınaý kózderinde ornalastyrylýǵa tıis. Statsıonarlyq jáne (nemese) kóshpeli omartalardy entomofıldi ósimdikterdi egý jáne (nemese) otyrǵyzý arqyly irgeles aýmaqtarda bal shyryndy bazany uıymdastyratyn statsıonarlyq jáne (nemese) kóshpeli omartalarǵa bes kılometrge jaqyn jerde ornalastyrýǵa jol berilmeıdi. Statsıonarlyq jáne kóshpeli omartalardy buryn ornalastyrylǵan basqa omartadan bal jınaý kózderine qaraı bal aralardyń ushý jolynda ornalastyrýǵa jol berilmeıdi, — delingen qujatta.
Osy jáne ózge de normalar elimizde bal ara sharýashylyǵyn damytý, sondaı-aq bal aralardy qorǵaý men saqtaý úshin jaǵdaı jasaý t. b. mindetterdi oryndaýdy maqsat etedi.
Aıta keteıik, QR Prezıdenti Qasym-Jomart Toqaev atalǵan zańǵa 2026 jylǵy 19 maýsymda qol qoıdy.
Ol alǵashqy resmı jarııalanǵan kúninen keıin kúntizbelik alpys kún ótken soń qoldanysqa engiziledi.
Eske salaıyq, buǵan deıin ara sharýashylyǵy týraly jańa zań omartashylarǵa qandaı múmkindik beretinin jazǵanbyz.
